Shillong, Risaw 26: Ka Meghalaya ka la sei madan ïa ka mynsiem ïakhun kaba tyngeh ha ka jingïalehkai ba nyngkong ban pynliem ïa ka Arunachal Pradesh da 38 ron ha ka jingïalehkai plate group ba nyngkong jong ki ha ka BCCI Senior Women’s T20 Trophy 2026-27 hynne ka sngi ha Sovima, Nagaland.
Ka Arunachal ka la jop ïa ka jingkynting pisa (toss) bad ka la jied ban bol nyngkong, katba ka Meghalaya ka la tied pyndep ïa ki 20 ober ban buh ïa ka thong kaba 111/3. Hadien nangta ka Arunachal ka la shah khanglad noh tang na ka bynta 73/7 haduh kaba kut jong ki ober ba la mang.
Ka Luiza Tamang ka la tied 37 ron khlem da shah pynkhyllem (not out) naki 30 tylli ki bol, ba kynthup ïa hynriew tylli ki saw ron (fours). Sha kawei pat ka liang, ka kapten jong ka kynhun Meghalaya ka Debasmita Dutta, ka la kamai 48 ron naki 57 bol (5x4s) khlem da shah pynhap. Ryngkat lang ki la noh synñiang ïa ka bynta kaba heh jong ka thong, ha kaba ka Meghalaya ka la pynkut ïa ka pali tied na ka bynta 111 ron ha ka jingduh noh tang lai wiket.
Haba beh ïa ka thong, ka Arunachal kam shym la paw ba ka don jingkyrmen ban kynjoh ïa kaei kaba ki donkam bad ka la shah khanglad tang hapoh 4 ron ha ka shi over. Ka Neha Hajong ka la khur 3/13 ha ki 4 ober, nangta ka Debasmita ka la khur 1/12 ha ki 4 ober bad ka Ajima Sangma ka la khur 1/13 na ki 4 ober.
Na ka bynta ka jingïalehkai kaba tyngeh ka Debasmita ka la shah jied ban khur ïa ka khusnam Player of the Match.
Ka Meghalaya kan ïakhun ïa ka jingïalehkai kaba ar pyrshah ïa ka Bihar ha kajuh ka madan.
