Pynkut ka M’laya ha ka kyrdan ba-ar naki kynthei, ba lai naki shynrang ha ka KIO NE Zone Karate C’ship

Shillong, Risaw 25: Ka Meghalaya ka la sei madan ïa ka jingïalehkai kaba tyngeh ban wan kyrdan ba ar ha ka jingïakop jong ki kynthei ha ka lympung KIO North East Zone Karate Championship 2026, kaba la pynkut ha ka sngi Saitjaiñ.
Ka kynhun ka la ïoh ban khur 17 tylli ki takma ksiar, 17 tylli ki rupa bad 46 tylli ki rnong (80 baroh haba kheiñ lang) ha ka jingïakop jong ki kynthei, kaba buh ïa ki ha ka kyrdan ba ar hadien ka Assam (31 tylli ksiar, 32 tylli ki rupa, 47 tylli ki rnong) kaba la rah ïa ka nam lahduh.
Katba ka kynhun karate ki shynrang jong ka jylla Meghalaya ki la pyndep ha ka kyrdan ba lai ha ka jingïakhun jong ki, da kaba khur 14 tylli ki takma ksiar, 14 tylli ki rupa bad 42 tylli ki rnong (70 tylli baroh), hadien ka lahduh ka Assam (37G, 38S, 61B) bad ka Arunachal Pradesh (20G, 15S, 17B) kaba wan ha ka kyrdan ba-ar.
Dei kine ki lai tylli ki jylla kiba la don ha ka jingïakhun ban khur ïa kiba bun tylli ki takma watla ka jingïakhun ka la long kaba jur bha hapdeng baroh ki nongïalehkai karate na ki hynñiew tylli ki jylla kiba ïashim bynta (kiwei pat ki long ka Manipur, Nagaland, Sikkim bad Tripura) ha kine ki ar sngi lynter jong ka lympung.
Lah ban kdew ba kane kadei ka jingïalehkai kaba seisoh na ka Meghalaya, ha kaba ka la khur 150 tylli ki takma baroh, kaba long palat ar shah ïa ki 62 tylli ba ka la khur ha u snem ba la dep ha Itanagar. Kane ka long ka jingpynshisha ïa ka jingtrei shitom ba la buh da ki nongïalehkai, ki coach kumjuh ruh ki bahaïing hasem jong ki.
Ka jylla ka la leh bha ruh ha kaba ïadei bad ka jingpynlong ïa kane ka lympung, kaba long ka jingjop kaba khraw namar palat 900 ngut ki nongïalehkai bad ki official ki la ïashim bynta ha kane ka jingïakob ba la pynlong da ka All Meghalaya Karate-Do Association (AMKA) ryngkat ka jingkyrshan jong ka Directorate of Sports and Youth India Affair jong ka sorkar Meghalaya hapoh ka jingpeit jong ka Karate India Organisation (KIO).
Napdeng ki riew pawkhmat kiba la wan sakhi ïa kane ka lympung ha Convocation Hall ha kane ka sngi Saitjaiñ ki long u Director ka tnad Sports u Alertson Nongbri bad ka Sherry Lalthangzo kaba dei ka Economic Adviser jong ka North Eastern Council. Baroh arngut ki la ïaroh ïa ka rukom pynïaid ïa kane ka lympung, ha kaba u bah Nongbri u la bynrap ba un ïasaid na ka bynta ban pynrung ïa ka karate ha ka 39th National Games, kaba ka Meghalaya kan pynlong ha u snem ban wan.
Ki nongjop na kane ka lympung kin ïoh rung sha ka KIO Inter-Zonal Karate Championship 2026, kaba la thmu ban long ha nongbah New Delhi kham hadien mynta u snem.
Nalor ka jingïakop kata bad kumite, la pynlong ruh ïa ka Seminar bad Eksamin jong ki Referee bad ki Coach jong ka KIO ha ka sngi Palei. Ka Meghalaya ka la don haduh 21 ngut ki nongïashim bynta ha kane ka prokram, ba la pynïaid da u Premjit Sen, Chairman ka Referee Commission jong ka KIO.