Ka jaitbynriew hapdeng ka jingduh jingkyrmen mano bantei pat ïa ka lawei jong ka -Bah Tesar Marweiñ

Mairang, Risaw 24 : Naduh hyndai hynthai ïa ka jaitbynriew Khasi Pnar la ju tip kum kata ka jaitbynriew ba tip briew tip blei, kaba tip kur tip kha bad kaba kamai ïa ka hok. Ka jingdon jong ka jaitbynriew ha katei ka kyrdan ka pynlong ïa ngi ba ngin sngew sarong bad sngewphuh mat bad ha kaba kum katei ka por haba ïaid sharum shaneng haba ïakynduh ïa ki lok ki jor ha lynti ha synkien bad haba ïakren ïakhana ym ju kham don kiba kren thala ïa ka eiei.
Haba phai pat ha kane ka juk kaba mynta hynrei katei ka nam bad ka burom jong ka jaitbynriew ka la nang hiar arsut khamtam eh ha kine ki sngi na ka jingkiew sted jong ka jingstad saïan & technology ka akor ka burom jong ka jaitbynriew ka la kylla pyrdet. Nalor kata kaba kham sngew pangmet shuh shuh haba ngi phah ha ka longbriew man briew ka dei na ka jingpyndonkam bakla jong ki briew ïa ki social media ha kaba kim salia shuh wat ban kren da ki ktien khlem akor kiba pyntad dor ïa ka jaitbynriew bad wat ïa ka longkur long jait.
Ngim lah ban len ba ka jingnang jingstad ka la nang kiew, ki skul ki la nang bun, ka jaitbynriew ka la nang roi, ki dukan die kyiad ki la sdang ban plie na kawei ka jaka sha kawei pat ki samla na ki nongkyndong ki la sdang ban tuid sha ki jaka sor ban wad bylla la ka dei ban shongïng briew ne trei da kiwei kiwei ki kam.Ngi ïohi ruh ba man la ka sngi ki jingsniew ki la sdang ban biah phongrai ha ki samla shynrang bad kynthei. Ka jingbud tynneng ha ka riam ka beit, ka ktien ka thylliej ka jur bha bad ki don ruh ki longïng ki bym ñiewkor shuh wat ïa ka ktien Khasi tynrai la jong hynrei ki kham ñiewkor ïa ka ktien nongwei.
Kaba kham sngewsih ka long ba katba nangmih ki sngi ki jingsniew ki nang kynrei ki jingïashoh ïadat, ki jingïapynïap para briew, ka tuh ka lute, ka jingthombor ïa ki kynthei khynnah, ki kam khaï drok, ki kam thok kam shukor para briew ki la synshar bad shongkulai ïa ka jaitbynriew. Ka jingsarong ka la nang kiew skong ha kaba ki don nongmihkhmat kiba ki dei ki nongsynshar kiba ki ñiew ïalade ba ki dei kiba biang lut, ki bym don jingduna bad ki da pyndonkam thala ïa ka kyrteng jong u Blei.
Ha kaba kum kane ka por ka la donkam ïa ngi kum ka jaitbynriew Khasi Pnar ba ngin kyndit bynriew katba ka por ka dang don bad ba ngin ïengskhem halor ka hok bad ka jingshisha na ka bynta ban tei ïa ka long briew man briew kaba skhem, ka synshar khaddar kaba shisur, ka imlang sahlang kaba beit. Ka por ka la dei ruh ba kum ka jaitbynriew ngi dei shim ïa ka jingkitkhlieh ban tei ïa ka lawei kaba bha khnang ba ka lawei kan long kaba khlaiñ bad kaba phyrnai.