Pynpaw ka JCMDA ba don ka jingkyrmen kaba bha halor ka kam dewïong ha jylla Meghalaya

Khliehriat Risaw 23: Ki nongïalam jong ka Jaiñtia Coal Miners and Dealers Association (JCMDA) lem bad ki nongialam jong ka State Coordination Committee ba kynthup ki seng dewïong kiba don hapoh ka jylla Meghalaya, mynta ka sngi ki la ioh ban iashong ïa ka jingialang ba kyrpang bad ka Commiitte kaba dei peit ïa ka kam dewïong bad na ka liang u Adviser ka JCMDA, u Dr P.Nongtdu u la ong ba hadien ka jingiakren ha ka jingialang la sngewthuh ba ka don ka jingkyrmen kaba bha halor ka kam tih dewïong hapoh ka jylla Meghalaya.
Ïa ka jingïalang la pynlong ha State Guest House ha Shillong bad ha kane ka jingialang la ïa don ryngkat lang ruh u Director jong ka Ministry of Coal Government of India, u Marapally Venkateshwarlu, u Director ka tnat DMR, u bah M.B.Tongper, ki heh na ka Coal India Ltd, ki heh sorkar na ka tnat DGMS bad na ka tnat CMPDI.
Shuh shuh, haba kren sha ki pathai khubor, u Dr P Nongtdu, u la ong ba “ha ka jingialang la ïakren halor shibun tylli ki mat ba ïadei bad ka kam tih dewïong ha kaba la ïatai sani bha ruh halor ka jingheh ka jaka ha kaba na ka liang ka committee ka la pynbor bad pynsngew da kaba ong ba ha ri India baroh kawei kam don kano kano ka jingkhang tih dewiong kynthup ka jylla meghalaya kata lada tih da ka open cast mining lane da ka Underground Scientific Mining, hynrei kaba eh hangne ka long ba ngim lah ban tih dewïong da ka open cast mining namar kane kam long kaba shngaiñ ïa ka mariang bad kam long kaba suk ïa ki trai dewïong ban pdiang ïa kane ka rukom tih dewiong, ka Committee ka la ong ruh ba lada tih da kano kano ka rukom ruh ka jaka ban tih dewiong kam dei ban duna ïa ka 100 heater bad halor kane la ïakren sani bha bad ka jingiakren ka la long kaba jwat bad ngi la pynshong nongrim katba lah ha ka rukom bat khyndew bad ka jinglong jingman ki jaka sha kane ka thaiñ bad ha kaba kut ngi la kyrpad ïa ka committee ba kan sngewbha ban pynlong noh tang 5 hecter ka jingheh khang ba ki trai dewiong kin dup lah ban pyntrei dewïonh, halor kane ka committee ka la sngap bad shah shkor bad ka committee ka la pynpaw ba kam lah ban kular pura ïa kane hynrei wat lada ym lah ban leh ïa kane ka 5 hectar ruh hynrei ka lah ban tam ne duna khyndiat ïa kane na ka bynta ka jingiahun lang na baroh arliang”
“Ka Committee ka la ong ruh ba ha ka jaka kaba heh ki nongtrei dewiong kin nym lah ban trei tang marwei hi, donkam ka jingiatreilang da kaba don da ka Cooperative Society bad halor kane ngi la pynpaw shai ba ngim lah ban pdiang ïa kane ka Cooperative Society bab ngi la aijingmut da kaba ngi la ong ba ha kane ka jaka la don lypa ka jingiatreilang ha ki kam bad ngi la tyrwa ba ngi lah ban thaw da ka kynhun jong ki nong trei dewiong bad ngin pynbha ïa ka jaka trei dewïong kumta ka Committee ka la weng noh ïa kane ka Coperative Society bad halor kane, ka Commiitte kan sa phah ïa ka kaiphot sha ki bor kiba halor bad yn sa pyntip pat hadien”
U Dr P.Nongtdu, u la iathuh shuh shuh ba ka Committee kan sa phah ruh ïa ki kaiphot sha ka Ministry kata ynda la dep ban lum lut ïa ki kaiphot bad ka Ministry kan sa pynsngew ïa kaba mih na ki kaiphot.
La ong ruh ba na ka liang ka Committee ka la wan jngoh ruh ïa kane ka jaka trei dewiong khnang ban pynshisha ïa ka jingkwah, jingdawa bad jingangnud ka JCMDA bad ban pynshisha ruh ïa ka jinglong jingman ka jaka ha ka thaiñ, ban tip u dewiong uba kumno bad halor kane ki dkhot ka Committee ki la dep iohi da la ki jong ki khmat bad ki la pynpaw da ka khmat ba sngewbha bad haba ïakren ha ka jingialang bad kane ka la ai jingkyrmen ïa ka JCMDA.
La iakren ruh halor ki mat ba iadei bad ki lad jingiada ïa ki nongtrei dwiong, jingiada ïa ka mariang naduh ka lyer, ka khyndew, ka shyiap, ki um ki wah, la iakren ruh halor ki aiñ ki kyndon kiba don hapoh ka Mines Act 1952 kiba kdew ba kumno ban iada ïa ki nongtrei bad iarap ïa ki lada don kano kano ka jingjia kaba sngewsih lane kano kano ka accident ha ka por ba trei.
Na ka liang ka JCMDA ka la pynpaw ba ka long kaba donkam ban bud ryntih ïa ki kyndon aiñ, ban wad ruh ïa ki lad ki lynti kiba iadei bad ki riti dustur jong ka jylla khamtam kiei kiei kiba iatyngkhuh bad ka Sixth Schedule.
“Ngi la iohi ba ka jingiaid paidbah da ka rally ba la pynlong myn ha ka 7 tarik u bnai iaiong 2026 kam shym long kaba lehnohei, ha kaba ngi na ka liang ka JCMDA ngi la ngi la ioh ka lad bad ngi la iakynduh ïa ki nongialam jong ka sorkar jylla, naduh u myntri rangbah ka jylla, u Symbud myntri rangbah, u bah Sniawbhalang Dhar, u Director ka tnat DMR kumjuh ruh bad ki ar ngut ki MLA na East Jaiñtia Hills District, ngi la ioh ruh ka lad ban iashong jingïalang bad ka committee ba la shna kyrpang da ka Ministry of Coal ba la wan na ka sorkar pdeng naduh Delhi bad iakren ïa ki kam dewiong bad iakren ruh ïa ka Scientific Safe Underground Coal Mining” ong u Dr Nongtdu.
Na ka liang ka JCMDA ka ai khublei ïa u Myntri rangbah ka jylla, u Conrad Sangma, u Symbud Myntri rangbah, u bah Sniawbhalang Dhar, ia ki MLA na East Jaiñtia Hills District, kiba la kyrshan bor bah bad ai ka jingiatreilang namar ka jingangnud ka JCMDA ryngkat lang ka State coordination committee ka long ba ban pynkhie im biang ïa ka rukom tih dewiong kaba ki ju trei, kumjuh ruh ka JCMDA ka ai khublei ïa baroh ki paidbah kiba kyrshan bad kiba ju ïa don ryngkat bad ka Association bad la kyntu bad kyrpad ïa ki paidbah ba kin iaishah lang bad ka JCMDA ha kane ka jingiaidlynti ka Association ha kaba iadei ba ki kam dewiong.