Jan 200 kilo ki waïar ba noh rynjaiñ ha kylleng ka nongbah Shillong phah tan lut u DC ka EKH

Shillong, Risaw 23 : Ki bor pynïaid District jong ka East Khasi Hills hapoh ka jingïalam jong u Deputy Commissioner, u Abhilash Baranwal, ki la ïoh ban tan haduh kumba 200 kilo ki waïar ba wah bad pur rynjaiñ ha kylleng ka nongbah Shillong.
Ha kajuh ka por ki bor distrik ki buh thong ruh ba la kumno kumno hapoh shi bnai kin weng bad pynbeit lut ïa ki waïar kiba sahkut ha jrong.
Na ka liang u DC haba kren bad ki lad pathai khubor ha ka sngi Thohdieng hadien ka jingjurip ïa kitei ki jaka u la ong ba kane ka sienjam baroh ka long katkum ka jingbthah jong u Myntri Rangbah ka Jylla, u Conrad K. Sangma.
“Katkum ka jingbthah jong u Myntri Rangbah ka Meghalaya, ïa baroh ki waïar bad cable kiba khlem da pynbeit ryntih la pynbeit. Bun ki cable kiba ïaid hapdeng ar tylli ki post la dep ban teh skhem ha ki jaka ba lah ban leh. Ha kajuh ka por, la weng noh ïa bun tylli ki waïar kiba la kyllaiñ, ki waïar kiba khlem pyndonkam shuh bad ki synduk kiba khlem pyndonkam,” la ong u DC
Nangta u la ong, “Ka jingthmu ba kongsan jong kane ka sienjam ka long ban peit ïa kiwei pat ki lad kiba lah ban leh ban pynitynnad shuh shuh ïa ka rukom ba la pynpur ïa kine ki waïar telecom ha ka nongbah,” u la ong.
U DC u la ïathuh ba ka bynta kaba nyngkong jong ka jingtrei ka la dep ha kiba bun ki jaka ba kongsan jong ka nongbah.
“Katkum ka jingïathuh da ki ophisar jong nga, ka bynta kaba nyngkong ka la dep ha kiba bun ki jaka ba kongsan jong ka nongbah. Hynrei lyngba kane ka jingjurip, ngi dang pyrshang ruh ban sngewthuh kumno ban pynbha shuh shuh ïa kane,” u la ong.
Haba kren halor ka jingpyntreikam ïa ki kyndon, u la ong, “Ngi la buh ïa ki katto katne ki kyndon halor ka rukom ba dei ban pynbeit ïa kine ki cable telecom. La pyntreikam ïa ka kyndon halor ka jingkynjang kaba duna tam kaba dei ban don ïa ki cable na madan. Ngi dang pan ruh na ki ban buh ïa ki dak jingithuh, wat lada kim lah ban buh dak ïa ki cable kiba ïaid hapdeng ar tylli ki post, hynrei ki hap ban buh dak ïa ki synduk bapher bapher.”
“La pyntreikam ïa kine ki kyndon, bad kino kino kiba pynkhein ïa kane yn weng lut ïa ki cable, ki box bad ki tiar kiba la buh ha kano kano ka jaka. La dep ban leh ïa kane,” u la ïathuh shuh shuh.
“Kane ka dei ka kam kaba dang ïaid shakhmat, bad ngi kyrmen ban pyndep ïa kane ka jingtrei hapoh shi bnai,” la bynrap u DC
U la ong ba kane ka jingtrei ka long shi bynta jong ka jingpyrshang ban pynitynnad shuh shuh ïa ka nongbah Shillong.
“Shisha, kane ka dei shi bynta jong ka jingpynitynnad ïa ka Shillong. U Myntri Rangbah u la pynpaw bunsien ïa ka jingsngewkhia halor kine ki waïar bad katkum ka jingbthah jong u, la pynlong ïa kane ka jingtrei ban pynitynnad bad pynbeit ryntih ïa ki,” u la ong.
Haba maham pyrshah ïa ka jingpynpur biang ïa ki waïar kiba pynpur ha suiñ, u la ong, “Lada don kiba kwah ban pynpur biang ïa ki cable hapdeng ar tylli ki post, ki lah ban teh ïa ki waïar kiba thymmai bad ki waïar kiba la dep ban teh skhem, lane ki lah ban ieh biang ïa kiba sahkut ha suiñ. Lada ki leh ïa kum kine ki kam, ïa kitei ki cable yn ot bad weng noh.”