Shillong Risaw 21: U kyrtong ka National People Party (NPP) ha ka elekshon MP shiteng samoi na Shillong Parliamentary constituency, u Dr DRL Nonglait u la pynpaw ka jingsngewskhem ba ka jingwan pynïasoh jong ki nongïalam kiba paw khmat sha ka NPP, kan nang pynkhlaiñ ïa ka party bad pynbun shuh ïa ki nongkyrshan.
Haba kren sha ki lad pathai khubor u Dr Nonglait u la ong ba ka jingwan rung ki 3 ngut ki MLA ka UDP sha ka NPP kan pynlah ïa ki ban khring shuh shuh ïa la ki nongkyrshan kaba long kawei pat ka lynti kaban pynsuk ïa u ban sha ka jingjop kaba don burom ha kane ka elekshon MP shiteng samoi kaban sa long shen.
U Dr Nonglait u la ong ba ka jingjied jong ki nongïalam ban ïatreilang bad ka NPP ka pyni ba ki don ka jingsngewskhem bad jingsngewïahap bad ka party, kaba lah ruh ban pynshlur ïa ki nongkyrshan jong ki ban ïasnohkti lang.
U la pynpaw ruh ba ki paidbah ki la pdiang ïa kane ka jingkylla ha ka saiñpyrthei bad kumta kan plie lad ïa ka NPP ban khring shuh shuh ïa ki nongkyrshan na kito ki constituency kiba la ju kyrshan ïa kiwei pat ki party mynshwa.
” Nalor ki MLA kiba la don lypa ryngkat bad kito kiba dang wan thymmai sha ka party kin nang pynkhlaiñ shuh shuh ïa ka NPP bad kane kan ïarap ïa nga ban kham thikna ban poi sha ka thong,” la ong u Dr. Nonglait.
U la pynpaw ka jingkyrmen ba ka jingkiew ha ka jingkhlaiñ jong ka party kan long ka jingkyrshan kaba khraw ïa u ha ka jingïakhun ïa kane ka elekshon shiteng samoi.
