Mad ki paidbah ïa ka jingdheng kali bajur ha ki kynta ba dang leit pynngam blei ha Polo

Shillong, Risaw 21: Ka Nongbah Shillong ha ka sngi Balang ha ka nohphai sngi ka la mad ka jingdheng kali kaba jur bha bad kane ka la neh katto katne por na ka daw jong ka jingïaid ki kali kiba kit ïa ki blei ki riewngeit Hindu ban leit bret ïa ki sha Wah kaba don ha Polo.
Ha kane ka sngi kiba bun ki kali naduh Motphran shaduh sha ophis jong u Deputy Commissioner jong ka East Khasi Hills bad ka surok kaba leit shaduh ka ïing jong u Lat ka Lok Bhawan ka la sahkut khlem khih bad ka jingdheng ki kali ruh ka la jur bha.
Kane ka surok lah ban ong ba kadei kaba kongsan bha naba bun na ki paidbah kiba don ki kali ki ju pyndonkam bha naba ka dei ruh ka surok kaba mih bad don bun tylli ki lad ban leit sha ki jaka bad ki shnong kiba pher bapher bad ki surok lyngkot kiba lah ban pynpoi kloi sha ki jaka ba la thmu ban leit.
Kane ka jingdheng ka la long ruh ba kito ki kali ba kit blei thaw jong ki riewngeit Hindu kiba wan naduh ki thaiñ Qualapatty, Mawprem, Rilbong bad kiwei kiwei ki jaka kiba don ha Sor Shillong, ki ïaid beit na kane ka surok bad kane la ïohi ba ym tang ki kali kiba rit hynrei bad ki kali kiba heh ruh ki ïaid na kane ka surok bad dei halor kane ba ka la wanrah ka jingdheng kali kaba ju ha kine ki kynta jong ka por ba ki dang leit ban bret ne pynngam ïa ki blei ha wah Polo.
Hynrei da ka jingshim khia jong ki pulit pynbeit ïaid kali bad ka jinglah jong ki, la kham pynsuk ïa ki paidbah kiba thmu ban leit sha ki jaka bapher bapher lyngba ki katto katne por.
Kiba bun na ki paidbah haba kren bad u nongthoh khubor ki la ïathuh ba ha kum kine ki por ba don kum kine ki jinglehniam na ka liang ka bor pynïaid distrik ka la dei ban pynmih ki jingpynbna bad ki jingpynbeit kiba long na ka bynta ka bha ka miat lang jong baroh ba kan ym ktah tang shiliang hynrei na ka bynta ka jingmyntoi lang jong baroh.