Da ka shithi beh seng pynher ka UDP ïa lai ngut ki MLA ba thmu leit ïasoh sha ka NPP

Shillong, Risaw 19: Khyndiat kynta hadien ba MLA ka United Democratic Party (UDP) kila leit ban kynduh kynduh ïa u Lamphang ka ïing Dorbar thaw aiñ ka jylla u Thomas A Sangma ban pynïasoh noh bad ka National People Party (NPP), ka UDP kala phah ïa ka shithi ba pyntip bala beh seng ïa ki lai ngut ki MLA.
Ïa kane ka shithi beh seng bala soi tang da u President ka UDP marwei u Bah Metbah Lyngdoh, la phah sha u Bah Paul Lyngdoh, Bah Renikton Lyngdoh Tongkhar bad u Bah Nujorki Sungoh.
Kat kum ka shithi, u Bah Metbah ula pynpaw ba kumba la paw na ki lad pathai khubor, kala long shai ba phi baroh phin sa ïasoh sha ka National People’s Party (NPP), kumta, da ka bor bala pynkup ha nga kum u President ka United Democratic Party (UDP), Nga beh noh ïa phi lai ngut na ka jinglong dkhot jong ka Party, naduh mynta ka sngi ka 19 tarik Risaw.
Lah ban kdew hangne ba ka UDP kaba don 12 ngut ki MLA hadien ka elekshon 2023, kala sah mynta satang uwei u MLA, uba dei u President ka Party Bah Metbah Lyngdoh, uba bat ruh ïa ka shuki Myntri ha ka Sorkar MDA-II.
Phra ngut na ki MLA ka UDP kila leit iasoh sha ka Bharatiya Janata Party (BJP) ha u bnai Nailur bad mynta sa lai ngut kila leit ïasoh sha ka NPP.