Mawkyrwat, Lber 24: Hadien ba la ïoh ïa ka jingtip thikna, ki BSF bad ki pulit jong ka South West Khasi Hills District, ha ka 24 tarik u Lber, 2022, ha ka por 6:30, ki la pynlong ïa ka jingleit khynra ha ki thaiñ Kalapahar, South West Khasi Hills District, kaba dei ka khappud bad ka Bangladesh.
Katkum ka khubor na u Superintendent of Police ka South West Khasi hills District, u Bah B.J. Laloo, u la ïathuh ba ha kane ka jingleit khynra, katei ka kynhun ka la lap ïa ki kuli kiba la buhrieh ha kawei ka synrang bad kiba la song ha ka pla jri.
Shuh shuh na kane ka pla jri la lap haduh 92 ki kuli ba 5.56 mm, 129 kiba 7.62 mm bad 160 kiba 9 mm bad haba kheiñ kyllum baroh ki long 381. “Ïa baroh ki tiar ba la ïoh la aiti noh hapoh Gumaghat Out-post”, ong ka tyllong khubor.
