Da ka ïingthymmai ai ka NPWF ïa ka longïing u heprit Chesterwell uba hap kit ïa ka lyngkor bakhia watla u dang rit

Nongpoh, Risaw 17: Ka National People’s Women’s Front (NPWF), ka kynhun ki longkmie jong ka National People’s Party (NPP), ka la aiti noh ïa ka ïing thymmai kaba la shna kyrpang na ka bynta u heprit Chesterwell Rynjah bad ka longïing jong u ha ka shnong Tyrso Mawlamase, hadien ba ka khana jong une u heprit ka la ktah ïa ka dohnud jong ki nongïalam jong ka seng.
Kane ka ïing thymmai, kaba la tei ha ka jaka ba la ai sngewbha da ka Tyrso Shnat Raid, ka long ka dak jong ka jingieit, ka jingsngewlem bad ka jingkitkhlieh ïa ki longïing kiba mad ïa ka jingeh ha ka jingim.
Ka khana jong u Chesterwell Rynjah ka la poi sha ki nongïalam ka NPWF lyngba u Jr. Story Teller Lyndon, bad ka la pynkhih ïa ka dohnud jong ki ban shim ïa ka rai ban ai jingïarap ïa une u heprit bad ka longïing jong u namar wat haka rta ba dang rit, u Chesterwell u la hap ban kit ïa ka lyngkor kaba khia namar ka kmie jong u, ka Kong Wandaphisha Rynjah, ka hap ban leit bylla sha jngai ban kyrshan ïa ka longïing, u Chesterwell u la hap ban peit ïa ki lai ngut ki para bad ban pyndep ïa ki kam ïing kiba bun, da kaba shim ïa ka lyngkor kaba ju kit da ki rangbah ka ïing.
Ka jingim jong une u heprit ka pyni ïa ka jingkitkhlieh ïala ki para, ka jinglen lade, ka jingieit bad ka jinglong ba shlur, hakajuh ka por ka pyni ruh ïaka jingeh kaba kaba utei u heprit u hap ban kit wat haka rta kaba u dang dei ban lehkai bad ban heh ban san.
Haba ïohsngew ïa kane ka khana, ki nongïalam ka NPWF ki la rai ban leh eiei da kaba pynïeng ïa ka ïing thymmai, khnang ba u Chesterwell, ki lai ngut ki para bad ka kmie jong u kin ïoh ïa ka jaka sah kaba shngaiñ, ban lait na ka lyer bad u slap.
Lyngba ka jingïatreilang bad ka jingkyrshan jong u MLA ka Mawhati, u Bah Charles Marngar, bad u Bah Ransom Sutnga, ka NPWF ka la lah ban pynurlong ïa kane ka jingthmu, bad ïa ka ïing la aiti noh mynta ka sngi Saitjaiñ ha ka jingïalang kaba lyngkot ha Tyrso Mawlamase.
Ha kane ka sngi la don lang u MLA ka Mawhati, u Bah Charles Marngar, ka MDC ka Nongpoh, ka Kong Rona Khymdeit, ka Kong Emi Kamilia Kahit, State General Secretary jong ka NPWF, ka Kong Rosilia Makri, General Secretary ka NPWF Ri-Bhoi, u Bah Chesterfield Madur, Rangbah Shnong Tyrso Mawlamase, ryngkat ki riew rangbah bad ki nongshong shnong.
Ki nongkren ha ka jingïalang ki la ai jingïaroh ïa ka NPWF halor kane ka kam isynei, da kaba pynpaw ba ka jingtei ïa kane ka ïing kam dei tang ka jingai ïa ka jaka sah, hynrei ka dei ruh ka jingai ïa ka jingshngaiñ, ka jingsuk bad ka jingkyrmen bathymmai ïa ka longïing kaba la mad ïa shibun ki jingeh.
Ki la pynpaw ruh ïa ka jingsngewnguh ïa u Chesterwell, uba wat hapdeng ka rta kaba dang rit, u la pyni ïa ka jingkitkhlieh kaba khraw ïa ki para jong u. Ha kajuh ka por, ki la kyntu ïa ka kmie jong u ba kan dang ïai trei shitom bad ban tei ïa ka lawei jong ka longïing ha ka nongrim jong ka jingtip briew tip Blei.
Kane ka jingïarap ka long ka jingpynkynmaw ba ka jingïeid bad ka jingïarap na ka imlang sahlang ki lah ban pynkylla ïa ka jingim jong ki briew. Na ka bynta u Chesterwell bad ki para jong u, kane ka ïing thymmai kam dei tang ka jaka ban sah, hynrei ka long ka dak jong ka jingkyrmen ba ka lawei jong ki kan long kaba kham phyrnai bad kaba dap da ka jingshngaiñ.