Bym ïoh um JJM ka Kher Jatap bad Lum-u-Smon kynduh SDP PHE ka HYC, kyntu ban shimkhia mardor

Shillong, Risaw 18: Ka Hynñiewtrep Youths’ Council (HYC), lyngba ka Shella Area Unit bad Jatap Unit, ka pynpaw ïa ka jingsngewkhia kaba jur halor ka jingbym ïoh um jong ki paidbah nongshong shnong ha Kher Jatap bad Lum-u-Smon lyngba ka Scheme JMM mynta la kumba 4-5 bnai.
Kane ka jingbym ïoh um kaba la neh slem ka la buh ïa ki paidbah ha ka jingeh kaba khraw ha kaba ïadei bad ka jingpynbiang ïa ka um dih bad kiwei kiwei ki jingdonkam ba manla ka sngi.
Ka um ka long ka jingdonkam ba kongsan tam ha ka jingim, bad kam dei satia kaba dei ban shah iehnoh ïa ki paidbah khlem ka jingpynbiang ïa kane ka jingdonkam ba kongsan.
Ka HYC ka sngewkhia ba watla la don ka Scheme JMM na ka bynta ban pynbiang um ia ki paidbah, hynrei ki nongshong shnong jong kine ki jaka ki dang hap ban mad ïa kane ka jingeh la bun bnai.
Kane ka pynmih ïa ka jingkylli halor ka jingtreikam bad ka jingpynneh pynsah ïa ka rukom pynpoi um lyngba katei ka scheme. “Namar kata, ngi kyrpad ïa phi kum u ophisar ba dei peit ïa ka PHE Shella Sub-Division ban shimkhia mardor ïa kane,” ong ka HYC.
Ha kajuh ka por ban pynlong ïa ka jingjurip ha Kher Jatap bad Lum-u-Smon, khnang ban lap ïa ki daw tynrai jong ka jingbym poi um bad ban pynbeit noh ïa ki jingduna kiba la mih.
Ki kyrpad ruh ïa phi ban pynthikna ba ka jingpynpoi um kan sdang biang khlem da pynslem shuh, bad lada donkam ïa ka por ban pynbeit ïa ka jingthut, ban pynbiang ïa ka um da kiwei pat ki lad shipor haduh ban da lah ban pynbeit pura ïa ka jingeh.
“Ka HYC ka khmih lynti ba phin shim ïa kane ka jingeh kum ka kam kyrkieh bad ban ai ka jingpynshai sha ki paidbah halor ki daw jong ka jingthut bad ki sienjam ba la shim ban pynbeit ïa ka. Ngi kyrmen ba phin leh ïa kaba donkam khlem da pynslem shuh, khnang ba ki paidbah jong Kher Jatap bad Lum-u-Smon kin lah ban ïoh biang ïa ka um kaba ki donkam ha ka jingim ba manla ka sngi,” ong ka HYC.