Halor Ka POCSO Act bad jingktah na ka Social Media, pynsngewthuh paidbah ka Kendra Hyper MA

By Mawphor Editor On Oct 19, 2026

Shillong, Risaw 18: Ka Kendra Hyper Martial Art (KHMA), Smit, ka la pynlong ïa ka prokram pynsngewthuh paidbah halor ka phang ‘Impact of Social Media & POCSO Act’ ha Fr. Michael Balawan Hall, Don Bosco, Smit, ban kyntiew ïa ka jingsngewthuh, ka jingïada bad ka jingkitkhlieh jong ka imlang sahlang, khamtam eh ïa ki samla bad ki khynnah.
Kane ka prokram ka thmu ban pynsngewthuh ïa ki bynta kiba kongsan halor ka jingktah jong ki Social Media bad ka jingdonkam ban ïada ïa ki khynnah na ki kam thombor bad ki jingkam kiba ktah ïa ka hok bad ka jingshngaiñ jong ki.
Ha kane ka jingïalang la ai jingbatai halor ka jingpyndonkam hok ïa ka internet, ki jingma kiba lah ban mih na ka jingpyndonkam bakla ïa ki Social Media, bad ïa ki hok jong ki khynnah hapoh ka POCSO Act (Protection of Children from Sexual Offences Act).
La pynshai ruh ba ka POCSO Act ka long ka aiñ kaba kyrpang ban ïada ïa ki khynnah kiba hapoh 18 snem ka rta na ki kam leh beijot bad kiwei ki kam thombor ha ka liang ka shongkha bad ka met.
Ha kane ka prokram la wan shim bynta ki khynnah na ki skul bapher bapher kynthup ïa ka St. Francis Higher Secondary School, Smit, ka St. Peter Secondary School, Smit bad ki khynnah jong ka Kendra Hyper Martial Art (KHMA), Smit
Ka KHMA, Smit, ka la pynpaw ïa ka jingsngewnguh ïa ka Kong R.M. Kurbah, IAS, bad ïa u Bah A Lyngdoh, Block Development Officer (BDO), Mawryngkneng Block na ka bynta ki ingkren ai jingmut bad ki jingïarap ban pynlong ïa kane ka prokram.
La pynpaw ka jingsngewnguh ïa u Bah P. Lamare, Officer-in-Charge (OC), Madanrting Police Station bad ïa u Bah C. Malngiang na ka District Child Protection Unit (DCPU), kiba la noh synñiang da ka jingpynshai kiba kordor halor ka jingïada ïa ki khynnah bad ka jingkitkhlieh jong ka imlang sahlang.
Ka KHMA ka ai khublei ruh ïa ki nonghikai bad ïa u Principal jong ka Don Bosco Higher Secondary School, Smit, na ka bynta ka jingai jingïarap bad ka jingpynbiang ïa ka jaka ban pynlong ïa kane ka prokram.
Lyngba kane ka jingïalang, ka KHMA ka kyrmen ban kyntiew ïa ka jingtip bad jingsngewthuh jong ki paidbah, khnang ba ki khynnah bad ki samla kin lah ban im ha ka sawdong sawkun kaba shngaiñ, kaba burom ïa ki hok jong ki bad kaba lait na ki jingpyndonkam bakla ïa ki Social Media.