Da ki hajar ngut ki riewngeit Katholik Garo ïashimbynta ha ka jingïalang kaba 13 ha Parish Pynthorumkhrah

Shillong, Risaw 18: Da ki hajar ngut ki riewngeit Katholik Garo ki la ïalum ha St. Joseph Higher Secondary School, Shnat Niam U Petrus bad Paulus, Pynthorumkhrah, ha ka sngi U Blei, ban ïashim bynta ha ka jingïakynduh kaba 13 man la u snem, ba la pynïaid da ka All Shillong A·chik Catholic Core Committee, Shillong.
Ha ka lympung kaba 13 halor ka matphang pdeng na Kollese 3:17: “Bad kaei kaei ruh kaba phi leh, la ha ka ktien lane ha ka kam, leh ïa baroh ha ka kyrteng U Trai Jisu, da kaba ai nguh ïa U Blei U Kpa lyngba jong U.”
Ki paid U Blei Garo ba ki la ïalum lang ka dei ka jingpynïatylli ïa ki dkhot ka imlang sahlang Katholik A·chik ha ka jingmane, ka jingai nguh bad ka jingïasnoh para bangeit. Nalor ka jingkñia Mass Bakhuid, la pynlong ruh ïa ki jingïashim bynta ha ki rwai bad ki jingshad tynrai kiba pynpaw ïa ka jingngeit bad ka kolshor jong ka jaidbynriew.
U Phadar Janerius S. Sangma na ka Diocese Tura u la long u nongkñia rangbah ha ka Mass Bakhuid. Ha ka jingkren sneng, u la pynshai ïa ka phang jong ka jingïalang bad kyntu ïa ki riewngeit ban burom ïa U Jisu Khrist lyngba ki ktien bad ki kam jong ki, bad ban ïaineh ha ka jingai nguh ïa U Blei ha ka jingim kaba man la ka sngi.
Haba pynpaw ïa ka jingïatylli jong ki Khristan kum ki dkhot jong ka Met U Khrist, u Phadar Sangma u la kyntu ïa ki riewngeit ban long ka nuksa babha lyngba ka rukom im jong ki. U la ban jur ïa ka jingdonkam ban pynpaw ïa ka jingngeit lyngba ka jingieit, ka jingsngewlem bad ka jingshakri ïa kiwei.
Ha jingïakynduh ka la pynpaw ruh ïa ka jingtrei jong ka imlang sahlang ban pynskhem ïa ka jingïatylli bad ban ïasam ïa ka jingkmen bad kiwei lyngba ka jingim Khristan bad ka jingïalong kawei.
Ki dkhot na ki Parish Nongmensong, Nongthymmai, Laban, Pynthorumkhrah, Mawïong bad Laitumkhrah ki la ïashim bynta ha ka prokram kolshor. Ki jingrwai bad ki jingshad tynrai ki la pynpaw ïa ka jinglong kyrpang jong ka jaidbynriew ryngkat bad ka jingngeit Khristan.
Ki samla ki la pyni ïa ki sap jong ki lyngba ki jingrwai bad kiwei ki jingïashim bynta, kiba kit ïa ki khubor jong ka jingngeit, ka jingsngewsynei bad ka jingpdiang ïa kiwei. Ki jingïashim bynta jong ki, ki la pynlong ïa ki nongïashim bynta ban pyrkhat halor ka jingsngewïapher bad ka jingdonkam ban pdiang ïa U Khrist ha la ka dohnud lyngba ka jingsngewlem ïa kiwei.
Kane ka jingïalang kaba ju pynlong man la u snem ka la ai lad ïa ki riewngeit Katholik Garo ha Shillong ban pynskhem ïa ka jingïadei ba kynja mynsiem, ban burom ïa la ka pateng kolshor bad ban nang pynjan ïa ka jingïasnoh parabangeit hapdeng ki parish bapher bapher kiba kynthup ïa ki riewniam shynrang bad kynthei ha ki jingrwai bad sur jingtem.
Ïa ka jingkynduh lang jong ki Garo Shillong la ïadon lang u Nongsharai Rangbah ka Shnat Niam Pynthorumkhrah u Sohblei Roy Anthony Pallikat bad u Sohblei Leoborki Dkhar phadar Synrop.