Ai burom u CM ïa ka jingnoh synñiang u (L) Bah H.S.Lyngdoh ha sngi rakhe dap 15 snem ka Mawkyllei College

Shillong, Risaw 18 : U Myntri Rangbah ka Jylla, Conrad K Sangma, ha ka Sngi Saitjaiñ u la pynbna ïa ka jingïarap pisa kaba 25 lak tyngka na ka Chief Minister’s Special Grant sha ka Mawkyllei College bad sa 5 lak tyngka na ka bynta ki samla pule ban thied ïa ki tiar tem bad ki tiar ïalehkai.
U la pynbna ïa kane ha ka jingrakhe ïa ka sngi seng kaba 15 snem jong ka Mawkyllei College, kaba long ha Dorbar Lyngdoh Nonglait Ground, West Khasi Hills ha ryngkat ka jingdonlang u MLA ka Mawthadraishan, Bah Shakliar Warjri kum u Symbud Kongsan.
Haba ai jingkren, u Myntri Rangbah u la ai khublei ïa ka kolej halor kane ka jingdap snem bad pynpaw ba ka dei ruh ka por ban ai burom ïa ki nong seng ïa ka kolej, ka imlang sahlang kaba la kyrshan ïa ka, ki nonghikai kiba la kit ïa ka kam pule puthi bad ki samla pule ryngkat ki longïing kiba la shaniah ha kane ka jaka pule.
U la pynkynmaw kyrpang ïa ka jingnoh synñiang jong u Bah Hopingstone Lyngdoh ba la khlad noh, uba long u nong seng bad nongtei ïa kane ka kolej, bad u la pynpaw ïa ka jingïadei kaba jan hapdeng jong u bad u (L) P A Sangma bad ka longïing jong u.
Haba kren halor ka pule puthi, u Myntri Rangbah u la ong ba kane ka dei kawei na ki bynta kiba kongsan tam ïa kano kano ka Sorkar, namar ka pule puthi ka long ka lad kaba khlain tam ban wanrah ïa ka jingkylla ha ka imlang sahlang.
U la ong ba naduh u snem 2018, ka Jylla ka la sakhi ïa ki jingkylla ha ka liang ka pule puthi, kynthup ïa ka jingpynkiew ïa ka mang tyngka, ka jingkiew ha ka jingpas ïa ki eksamin board, ka jingbha ha ka jingkheiñ kyrdan PGI, ka jingtei ïa ki kolej bad ki jaka pule kiba kham shalor, kumjuh ruh ka jingpynbha bad tei thymmai ïa ki skul.
“Ka pule puthi ka la sakhi ïa ka jingkylla bad ngi ïaid ha ka lynti kaba dei, hynrei ka jingïaid lynti jong ngi kam pat kut bad dang don shibun ki kam ban leh ha kane ka bynta,” u la ong.
U la pdiang ba ka pule puthi ka dei ka bynta kaba don bun ki jingeh, bad u la kyntu ïa baroh ban ïatreilang. U la ong ba ka jingthmu jong ka Sorkar ka long ban pynbiang ïa ki lad pule kiba kham shalor wat ha ki jaka nongkyndong ruh. Ka Sorkar ka kyrshan ïa bun tylli ki skul bad kolej bad ka dang trei ban pynkhreh ïa ka polisi ban kyrshan ïa ki jaka pule kiba trei bha bad kiba lah ban ai kham bun ki lad ïa ki samla pule.
Haba pynkut ïa ka jingkren, u Myntri Rangbah u la ong ba ki 15 snem ba nyngkong ki la plie lad ïa kham bun ki samla ban ïoh ïa ka pule puthi kaba kham shalor bad pynkhlaiñ ïa ka nongrim jong ka jingïashim bynta jong ka imlang sahlang. Ka bynta kaba bud ka dei ban pynkhlaiñ shuh shuh ïa ka jinglong bha jong ka pule puthi, ban ai jinghikai bad jingïalam ïa ki samla pule, bad ban pynkhreh ïa ki na ka bynta ka pule puthi kaba kham shalor, ka ïohkam ïohjam bad ka jingshakri ïa ka imlang sahlang.
Khyndiat shaphang ka Mawkyllei College bad ka jingnoh synñiang jong ka shnong –
La seng ïa ka Mawkyllei College ha ka 06 tarik Jylliew, 2011, hadien ba ka shnong Mawkyllei ka la sngewthuh ba bun ki samla kiba pyndep ïa ka Class XII ki shem jingeh ban bteng ïa ka pule puthi ha ki sor kiba jngai namar ka jinglut kaba kham bun.
La pynlong ïa kane ka jingthmu lyngba ka jingïatreilang jong ki nongshong shnong bad ka jingkyrshan kaba khlain jong u Bah Hopingstone Lyngdoh ba la khlad noh.
Mynta, ka kolej ka la heh bad shakri ïa palat 150 ngut ki samla pule, bad ka don palat 18 ngut ki nonghikai bad ki nongtrei. Kane ka pyni ïa ka jingroi kaba suki hynrei kaba skhem jong ka jaka pule kaba la mih na ka jingminot jong ka shnong.
Ka kolej kam dei tang ka jaka pule jong ka thaiñ, hynrei ka la pynsuk ïa ki samla ban bteng ïa ka pule puthi hadien ka Class XII khlem da hap ban leit jngai na la ki shnong. Katba ka kolej ka dang pynkhlaiñ ïa ka pule puthi, ka don ruh ka lad ban shakri ïa ki samla na ki shnong ba marjan bad na kiwei pat ki bynta jong ka thaiñ, bad ban noh synñiang shuh shuh sha ka pule puthi kaba kham shalor ha Meghalaya.