Mawkyrwat, Lber, 22: Kum shibynta ban pynshai paidbah halor ka jingkordor jong ka umbam umdih ha man la ki tynkong ïing ka ophis jong u Executive Engineer, PHE Cum Member Secretary DWSM (JJM), South West Khasi Hills District, Mawkyrwat mynta ka sngi ka la pynlong ïa ka jingïaid paidbah (rally) ha kaba ïadei bad ka Jal Jeevan Mission (JJM) kaba la sdang na phyllaw ophis jong u Block Development Officer, Mawkyrwat C&RD Block bad pynkut ha phyllaw ka ophis PHE, Mawkyrwat.
Ha katei ka jingïaid rally la ïashimbynta shitrhem da ki khynnah pule jong ki skul bapher bapher ryngkat ka jingsynran lang u paidbah bad ki nongtrei ka PHE kiba la pyrta ïa shibun ki jingthoh (slogan) kum “Save water save life”, “no water no food, yes water yes food”, “wat bret ñiut pathar sha lum sha wah ïoh ngi jynjar trah”, “ngim im khlem ka um” bad kiwei dei. Ki la rah ruh ki placard ba thoh shibun ki kyntien kum “ka um ka dei ka jingim, ngi dei ban tyngkai ïa ka”, “conserve water to sustain life”, “ka um ïa ngi ka ai jingim bad lada ngim tyngkai U Blei ïa ngi un tim” bad kiwei de ki jingthoh ba ïa dei bad ka jingsumar, jingtyngkai bad pynneh pynsah ïa ka um.
Haba kren shuwa ban sdang katei ka jingïaid paidbah u bah Stevan Roy Wahlang, District Coordinator, JJM, Mawkyrwat u la ong ba ka jingthmu katei katei ka Rally ka long ban pynsaphriang ïa ka khubor halor ka phang, “ban tyngkai ïa ka um bad pynneh pynsah ïa ka” na ka bynta ka bha ka miat hadien habud kumjuh ruh ban pyntip paidbah halor ka thong jong ka JJM ban pynpoi um ha manla ki tyngkong ïing hapoh jong ki shnong, ki skul bad ki Anganwadi Centre ha SWKHD. U la ong ruh ba ka long kawei na ki lad ban ai jingtip sha u paidbah ba kumno kin sumar ïa ka mei mariang, ïa ki tyllong um, ban ym pynjakhlia ïa ki bad kumno kin tyngkai ïa ka um.
Haba pynkut ïa katei ka prokram ha phyllaw ophis PHE u I/c EE, PHE, Mawkyrwat, bah R. Nongdhar, SDO Mawkyrwat Sub Division u la ai khublei ïa ka jingshimbynta shitrhem jong ki khynnah skul, ki lad pathai khubor, ki paidbah bad ki nongtrei katei ka ophis. U la ong ruh ruh ba katei ka jingïaid paidbah ka la pynshai shikatdei ïa u paidbah ha kaba ïa dei bad ka Jal Jeevan Mission. U la bynrap ruh ba katkum ka JJM dei ban pynpoi um lut ha man la ki tyngkong ïing hapoh distrik.
U la pynkut da kaba ong ba ngi dei ban long kiba ñiewkor ïa ka um ïoh ka poi ka por ba ka um ka kham rem ban ïa ka ksiar.
