85 % ki tiar ki la biang donkam ban thung noh ïa ki nongtrei ha MCH Hospital Nongstoiñ

Nongstoiñ, Risaw 14: Hadien ka jingleit jurip ban kylli bniah ha kaba ïa dei bad ka MCH Nongstoiñ West Khasi Hills District, na ka liang ki saw tylli ki seng jong ka West Khasi Hills kiba kynthup ïa ka WKSU, WYF, MYF bad ka UHM, ki la dap da ka jingsngewhun ka mynsiem ha kaba ïa dei bad ka jingpyntreikam noh ïa katei ka Hospital kaba dei kyrpang ïa ki longkmie bad khunlung.
Ki nongïalam jong ki saw seng ha ka jingïakren bad ka Medical Superintendent kaba dei ka khlieh nongpeit ïa katei ka Hospital, ka la pyntip ba kumba 85 percent ei ei ki tiar ki tar ki la don lut kiba la bit la biang ban pyntreikam noh ïa katei ka Hospital.
Hynrei, ki don ruh sa tang katto katne ki tiar ki bym pat poi ki dang hap ban ap, kum ka machine auto clip kaba dei ka machine ban check lane sterilize ïa ki tiar shwa ban puid. Halor kane ka dang don hi ka jingeh ba hap ban phah sha Shillong ïa ki nongpang kat bym pat don katei ka machine.
U Bah Hamar Lyngkhoi President ka seng MYF u la ong ba kaba ïa dei bad ki jingthiah ruh katkum kaba la mang ka dei 50 jingthiah, hynrei sngew kmen pat ba katkum ka jingleit jurip bad katkum ka jingong jong ka MS, ka la ïathuh ba nalor kine ki sanphew jingthiah la lah ban buh biang sa kumba 30 jingthiah kaba la poi sha ka 80 jingthiah baroh.
Katba na ka liang u Bah D.Sun President WKSU u la ong ba kaba dang sah teng mynta ka dei satang na ka liang ki nongtrei (staff nurse) ïa kaba ka jingthung ïa ki nongtrei, ka don noh hapdeng ka kynrum kynram kumba kaba la mih ha kine ki khyndiat sngi, kaba wanrah jingeh ban pyntreikam ïa kane ka Hospital.
U la ong pat ba na ka liang ka jong ki saw seng ki buh ka jingkyrpad ïa ka sorkar ba ka dei ban pynkloi noh ban pynbeit ïa kine ki kynrum kynram ha kaba ïa dei bad ki staff nurse, khnang ba kane ka Hospital kan ïaid beit ïaid ryntih noh nangne sha khmat.
Ha kaba ïa dei bad ki machine kiba dang sah teng, ki nongïalam jong ki saw seng ki buh ka jingdawa na ka sorkar ba ka dei ban pynkloi noh ban pynpoi ïa kine ki tiar bad ïa kiwei kiwei ruh kiba dang donkam ha kane ka Hospital.
Ha kaba ïa dei bad ka Civil Hospital kaba don ha Mawïaban, na ka liang ki saw seng ki dawa jur ba ka sorkar kan shimkhia ïa kine ki mat jingdonkam kum ki machine CT scan bad ka MRI machine, khnang ba ka pynsuk ïa ki nongwan sumar jong kane dong ka thaiñ.
Ka jinglong sah kumjuh na ka daw ka jingbym biang ha kaba ïa dei bad ki tiar test, ka wanrah jingeh ïa ki nongpang ban ïoh ka jingsumar. Kumta ka sorkar ka dei ban shimkhia ban pynbiang paka ïa ki tiar kiba donkam, khnang ba ki paidbah ka West Khasi Hills kin suk bad ïoh ka jingsumar kaba biang.