193 klur la pyllait ka sorkar bad haduh 88,061 ngut ki samla pule ba la ïohpdiang ka scholarship ST

By Mawphor Editor On Oct 15, 2026

Shillong, Risaw 14 : Haduh 88,061 ngut ki samla pule ST ha Meghalaya ki la ïoh pura ïa ka scholarship hapoh ka Umbrella Post-Matric Scholarship Scheme na ka bynta u snem pule 2025-26, hadien ba ka Sorkar Jylla ka la pyllait ïa ka bynta ba khatduh jong ka pisa ha ka Sngi Balang.
U Myntri Rangbah ka Jylla, Conrad K Sangma, u la pyllait ïa ka instalment kaba ar bad kaba khatduh ha St Anthony’s College, Shillong. U la ong ba ka scholarship ka dang long kawei na ki mat ba kongsan tam ïa ki samla pule.
Haba kren ha ka jingïalang, u Myntri Rangbah u la pyntip ba ka rukom siew lyngba ka Direct Benefit Transfer (DBT) ka la sdang, bad ki samla pule kiba dang ap ïa ka pisa ki dei ban pynthikna ba ki bank account jong ki ki dang treikam bad ki la pynïasoh bad ka Aadhaar.
Katkum ka jingong jong u, “Don ki nongïoh jingïarap kiba la dep ban pynshisha ïa ki kot ki sla hynrei kim pat ïoh ïa ka pisa namar ka Aadhaar kam pat ïasoh bad ka bank account kaba treikam, lane dang ap ïa ka jingpynshisha na ka PFMS. La bthah ïa ki tnad sorkar ba kin buddien bad pynbiang biang ïa kine ki kam haduh ban da dep siew lut”.
U Myntri Rangbah u la kyntu ïa ki samla pule ban pyndonkam hok ïa ka pisa na ka bynta ki jingdonkam ha ka pule puthi.
Ha kane ka sngi, u la plie ruh ïa ka PG Block jong ka Department of Biotechnology bad Bio-Informatics Lab, ki jingdonkam ba la pynbha thymmai, ki tiar hapoh ka RUSA 2.0 bad Computer Lab hapoh ka CM Skills Mission ha St Anthony’s College.
Katkum ki jingkheiñ ba la pynmih, la pynshisha ïa ki jingtip jong 96,801 ngut ki samla pule na ka bynta u snem 2025-26. Na kine, 88,061 ngut, kaba long 91%, ki la ïoh ïa ka scholarship pura, kynthup ïa 52,839 ngut ki nongaplai thymmai bad 35,222 ngut kiba pynthymmai ïa ka scholarship.
Ka pisa baroh kaba la pyllait na ka bynta une u snem ka long 198.43 klur. Na kane, la dep pynlait ïa ka instalment kaba nyngkong kaba 93.95 klur, kaba kynthup ïa 84.55 klur na ka Sorkar Pdeng bad 9.40 klur na ka Sorkar Jylla. Ka instalment kaba ar kaba 104.48 klur ka kynthup ïa 94.03 klur na ka Sorkar Pdeng bad 10.45 klur na ka Sorkar Jylla.
Ha kane ka prokram la ïadonlang u Myntri ka tnat Pule Puthi, Bah Lahkmen Rymbui, u Myntri Sorkar ka Jylla Bah Sanbor Shullai, u Commissioner & Secretary Vijay Mantri, u Principal Fr Arcadius Puwein bad kiwei kiwei.