Plie u Myntri Rangbah ïa ka Meghalayan Age Pavilion kaba shongdor 11.52 klur ha Ward’s Lake

Shillong, Risaw 14 : U Myntri Rangbah ka Jylla, u Conrad K Sangma u la plie paidbah ïa ka Meghalayan Age Pavilion ha Ward’s Lake, da kaba ong ba kane ka jaka kan pyni ïa ka jinglong tynrai ba shisha ka Meghalaya, ha kaba la pynïasoh lang ïa ki jingbam, ki mar ba pynmih hi, ki nongkhaïi, ki nongtrei kti bad ki sap bapher bapher.
“Ka Pavilion kan pyni ïa ka jinglong ba kyrpang ba shisha ka Meghalaya. Ka pynïasoh lang ïa ki jingïathuhkhana bapher bapher kiba pyni ïa ka Jylla jong ngi. Ka jingthmu jong ngi ka long ban thaw ïa ki jaka kiba ym tang ba kin wanrah ïa ki lad kamai kajih, hynrei kiba pynpaw bad pynneh ruh ïa ka kolshor, ka pateng bad ka jingithuh jong ka Meghalaya,” la ong u Sangma.
Ha ka jingïalang plie ïa kane ka Pavilion la donlang u Myntri ka tnad Jngohkai Pyrthei, u Timothy D Shira, ki heh ophisar, ki nongkhaïi bad ki nongtrei kti. Ha kane ka sngi, u Director jong ka Urban Affairs u la aiti ïa kane ka jaka sha u Chairman-cum-Managing Director jong ka Meghalayan Age Limited na ka bynta ban pynïaid bad sumar ïa ka.
Katkum ka jingong jong ki ophisar, ïa kane ka Pavilion la tei ha ka jinglut kaba T.11.52 klur, ha ka jaka kaba heh 16,000 square feet hapoh ka compound jong ka jaka sah jong u Deputy Commissioner. Kane ka dei ka projek kaba nyngkong kaba la lah ban pyni paidbah hapoh ka Creative Redevelopment Plan jong ka Sorkar na ka bynta ka nongbah Shillong.
Kane ka plan, kaba la ïoh ïa ka jingïaroh na ka Ministry of Housing and Urban Affairs kum ka nuksa thymmai na ka bynta ki nongbah ha ki jaka ba rit ki jaka, ka pyndonkam biang ïa ki jaka ba long trai jong ka Sorkar na ka bynta ka jingmyntoi paidbah. Kane ka projek ka la ïoh ruh ïa ka jingïarap pisa hapoh ka Challenge-Based Funding jong ka Special Assistance to States for Capital Investment 2025-26.
Kiwei pat ki projek hapoh kane ka plan ki kynthup ïa ka jingpynbha thymmai ïa ka Anjalee Junction, ka PWD Complex ha Barik, ka jingpynbha ïa ka mariang sawdong ka Ward’s Lake, ka park paidbah ha ka jaka jong ka Raj Bhavan, ka Street Food Hub ha ka jaka jong ka State Guest House bad ka Wah Umkhrah Riverfront Development.
La pynkhreh ruh ïa ki jaka die mar ba la pynbeit kyrpang ha Brightwell Bungalow, Barik, Laitumkhrah bad Dhankheti.
Ka Pavilion ka don saw tylli ki bynta ba kongsan, kata ki kam khaii kiba ïoh jingïarap na ka PRIME, ka Meghalayan Age Shillong Store kaba pyni ïa ki tiar thaiñ jaiñ, ki tiar shna kti, ki mar pynkoit pynkhiah bad kiwei ki mar ba shna da ki nongtrei kti, ka Food and Hospitality Zone bad ka Fruit Wine Experience Centre.
Ha kane ka sngi, 16 ngut ki nongkhaïi kiba ïoh jingïarap na ka PRIME ki la ïoh ïa ki sanction letter ban pynïaid ïa ki kam khaii jong ki na kane ka Pavilion.
La aiti ruh ïa ka restaurant sha u Adonijah Lyngdoh, uba la jop ïa ka jingïakop Hills on a Plate, katba ïa ka Fruit Wine Experience Centre la aiti sha ka Meghalaya Fruit Wine Makers’ Association.
Ka prokram plie ïa kane ka Pavilion ka la kut da ka jingpyni ïa ka Ryndia Collection kaba la pynkhreh da u Bah Daniel Syiem, ryngkat bad ki jingshad bad jingrwai hapoh ka Meghalaya Grassroots Music Project.