Shimkhia u Myntri bad MLA yn sdang biang ban kit ïa u khaw rashon sha West Khasi Hills District

Nongstoiñ, Risaw 14: Hadien lai bnai duna ba ki paidbah ka West Khasi Hills ki la duh noh ïa u khaw rashon, namar ka jingmih ki katto katne ki kynrum kynram hapdeng ka shnong Pyndengrei Nongstoiñ bad ka ophis ka FCI, na ka liang u bah Methodius Dkhar myntri ka Food Civil Supplies & Consumer Affairs Department, ryngkat u bah Gabriel Wahlang MLA ka Nongstoiñ, lem bad ka Hema Nayak Deputy Commissioner ka West Khasi Hills District, ha ka sngi balang jong ka taiew 14 tarik Risaw 2026, ki la shim ïa ka rai ban pyntyllun biang ïa ka kam kuba ju leh man ka por.
Ha ka jingïalang kaba kyrpang ha DC ophis ba la donlang ruh da u sordar ka shnong Pyndengrei Bah Michael Marweiñ lem bad ki dkhot ka dorbar shnong, nangta u Mritunjay Kumar DM ka FCI, lem bad ki ophisar na ka Civil Supplies bad tnad PWD Road Nongstoiñ, ka la don ka jingïatai sani kaba la neh kumba katto katne por, ha kaba baroh ki liang ki la poi noh sha ka jingïasngewthuh jingmut bad la ïoh ïa ka jingmynjur lang ban sdang biang ka jingkit ïa u khaw kumba ka dei ban long.
Ha ka jingïakren bad ki nongthoh khubor ka shnong Pyndengrei, u sordar ka shnong u la ong ba naduh u snem 2024, ka shnong ka la dep ai jingthoh shaduh u myntri rangbah ka jylla Meghalaya, ba un jngoh lem ïa katei ka surok kaba jngai tang kumba 160 meter na ka surok bah shaduh jaka buh khaw jong ka tnad FCI. Nalor nangta ka dei ruh kawei na ki surok kaba ju jia khah khah ka jingtwa khyndew khamtam ha ka por lyiur ha kaba ka surok ka la sniew shaba palat.
Hynrei, ka shnong kam shym la ïoh kano kano ka jubab bad dei tad mynta ka sngi ba u bah Methodius Dkhar myntri ka sorkar jylla, u la shim ïa ka jingkitkhlieh ban leh ei ei haba ïadei bad katei ka surok.
Watla ka jingïakren ka la poi sha ka jingmynjurlang ba yn plie noh ïa ka surok, hynrei lada ka shu long tang ka jingïakren khlem larkam, ka shnong kan sa leh ïa kaba donkam, ong u bah Michael Marweiñ Sordar ka shnong Pyndengrei.
Katba na ka liang u Bah Methodius Dkhar Myntri ka Food Civil Supplies & Consumer Affairs Department, haba kren sha ki lad pathai khubor u la ong, “Ha kine ki khyndiat por kiba la dep ki la don ki khubor kiba pynsaphriang bakla sha ki paidbah. Hynrei mynta ka sngi ngi pynshai sha ki paidbah ba kim dei ban shah ïalam bakla ha ki khubor ki bym da tip ïa ka jingshisha”.
“Hooid ym lah len ka la don ka jingeh khyndiat, ha kaba na ka liang ka shnong ki Pyndengrei ki pynpaw halor ki jingeh kiba ïadei bad ka surok kaba wan na surok bah shaduh sha FCI, namar ka surok ka sniew palat na ka daw ka jingïaid ki trok kit khaw kiba 12 taiar bad 16 taiar. Kata hi kaba ki nongshong shnong ki pynpaw ka jingeh. Ki kwah ruh ba ka tnad bad ka PWD kin ai ka jingpynskhem ba lada ka sniew katei ka surok ba ki dei ban pynbha”, ong u Bah Methodius.
“Mynta ka sngi da ka jingsngewkhia halor kine kiei kiei, na ka liang jong ngi ryngkat ka PWD, ka tnad ba dei peit ïa u khaw bad na ka liang ka shnong, ha kaba ngi la ïakren bad ai ka jingkular wat na ka liang ka PWD ban peit ban jngoh ïa katei ka surok lada ka long ban pynbha ne wat ban pynheh ruh ïa katei ka surok”.
“Nga ai khublei sha baroh ki nongïalam shnong Pyndengrei khamtam ïa u sordar shnong bad ïa baroh ki tnad kiba la shimkhia ïa kane kynthup ïa u MLA ka Nongstoiñ, ba naduh mynta ka sngi kan ym don shuh kano kano ka jingeh bad na ka liang ka tnad kan lah ban pynpoi biang ïa u khaw kumba ju long baroh shikatta”, ong u Myntri.