Nongstoiñ, Risaw 14: Ka Hynñiewtrep Youths Council Nongstoiñ Circle, mynta ka sngi ka 14 tarik Risaw 2026 ha ka jingïalam jong u samla Olivertwis Marngar Vice President lyngba ka Sier Lapalang Operation jong ka HYC, ka la ïoh ban leit ban beh ïa ki bar jylla
kiba don kumba hynñiew ngut ei ei kiba wan shna pandal ha MCH Nongstoiñ khlem ki kot ki sdang kiba biang.
La ong ba kine ki bar jylla ki wan ban trei ïa ka pandal na ka bynta ban plie ïa ka MCH Nongstoiñ lashai ka sngi 15 tarik da u Chief Minister. Hynrei, ki nongïalam ka seng ki ong ba ïa ka roi ka par jong ka thaiñ baroh hi ki pdiang sngewbha, tangba ban phah trei ïa ki kam da kiba nabar da lei lei kin nym shah.
Ki la ong ruh ba kum ïa kine ki jait kam, ki paradoh parasnam la jong ki la nang ban trei balei ban da donkam ban phah ïa ki bar jylla. Kane ka jingailad ïa kiba nabar, ka pynduh mynsiem bad ka tuh noh ïa ka hok jong ki paradoh parasnam, ki samla jong ka dong ka thaiñ kiba don kum kane ka sap.
Ka Seng ka maham ruh ba nangne shakhmat da lei lei kan ym shah ban wanrah ïa ki nongtrei kiba nabar, haba ïa ki jingtrei lah ban trei da ki jong lade ki paradoh parasnam. Ka seng ka maham ruh ba kino kino ki contractor kiba wan rah nongtrei bar jylla sha ka dong ka thaiñ khlem ki kot ki sla ba biang da lei lei kin ym shah.
