Shillong, Risaw 14 : U Deputy Commissioner jong ka East Khasi Hills, Abhilash Baranwal, u la ong ba ki bor district kin pynthikna ba ki pandal Durga Puja kiba don ha ki surok PWD kin ym pynwit ïa ki paidbah, watla ka jingkynriah ïa ki ha kane ka por ka long kaba eh.
Haba kren bad ki lad pathai khubor, u la ong ba la bthah ïa ki sector magistrate ban ïatreilang bad ki dorbar shnong, ki pulit bad kiwei ki bor ban pynbeit bad pynthikna ïa ka bit ka biang jong ki paidbah, khlem da ktah ïa ki hok lehniam jong ki paid Hindu.
Halor ka pandal ha RR Colony, u la ong ba la shah ban bteng ïa ka jingtei mynta u snem katkum ka NOC jong ka PWD, hynrei la maham ba kum kane ka jingpynbeit kan ym lah ban bteng ha ki snem ban wan namar ka jingpynwit ïa ki paidbah.
U DC u la ong ruh ba ka bor synshar ka la ïatreilang bad ka ophis jong u SP ban pynbeit ïa ki jingkylla lynti bad pynduna ïa ka jingdheng kali. La bthah ïa ki pulit ban pynbiang ïa ki nongpynïaid kali ha ki surok.
Halor ka jingpynngam um ïa ki blei, u la ong ba la buh ha la ka jong ka jong ka por na ka daw jong ka jingtei ha ki rud wah, kaba la pynduna ïa ka jinglah ban pynngam ïa ki blei ha kajuh ka por. U ong ruh ba ia kane yn sa pynbeit ïa ka por na bynta kito ki pandal ban leit sha jaka pynngam blei da kaba kheiñ ïa ka por jingïaid jong man la ka pandal, khnang ban pynduna ïa ka jingdheng kali.
