Naduh u bnai Nailur yn sdang ban pyntreikam da ka BAS ha ka jinglut ba 5 lak duna
Ban poi biang por ki nongtrei ka KHADC
Shillong, Risaw 14: Ka Khasi Hills Autonomous District Council (KHADC) naduh u bnai Nailur kala sdang ban pyntrei kam da ka Biometric Attendance System (BAS) ha ka jinglut kaba la kot kumba T. 4, 59, 854 lak.
Ïa kane la pynpaw da u Bah Winston Tony Lyngdoh uba dei u Chief Executive Member (CEM) ka KHADC ha ka sngi sdang ka Dorbar Tlang ha ka kynta kylli jingkylli kaba la kylli da u Bah Titostar Well Chyne uba dei u MDC ka Sohra uba dei ruh u nongialam ka liang pyrshah.
Na ka liang u CEM u la ong, Hooid ka Executive Committee kala pyntrei kam ïa ka BAS na ka bynta ki ophisar bad ki nongtrei jong ka Khasi Hills Autonomous District Council.
Shuh shuh u la ong la pyntrei kam ïa ka BAS naduh ka shi tarik u Nailur 2026 ban pyntikna ïa ka jingwan biang por jong ki nongtrei ka Council.
Haba bynrap biang ïa ki jingkylli u Bah Titos u la ong ba na ki nongtrei baroh katno ngut ki nongtrei kiba pyndonkam da kane ka BAS, halor kane u CEM u la ong ba u donkam da ka notis namar ba um don jingkhein katno ngut kiba pyndonkam.
U CEM u la pyntip ba ïa kane ka BAS la pyllait noh tang ïa ki nongtrei kiba don ha ka Judicial bad ïa ki dkhot kiba la shah jied ha u paidbah ne ki MDC.
Ha kaba iadei bad ki nongtrei kiba don ban leit sha field, u CEM u la ong ba ki nongtrei kiba dei leit sha field kidei ban pyntip lypa shuwa ka por ne shi sngi shwa ban leit sha u nongpyniaid ne superviser ban pynbiang ha ki register.
Shuh shuh haba kylli u Bah Tistos u la kylli ba hato sha ki shnat trei kam kiba don shabar ka District la yn leh lang kujuh, u CEM u la ong ba ka EC ka don jingmut ban pyniar sha kiwei de ki shnat trei kam tangba hap shwa ban pynbiang ïa ki internet.
U MDC ka Sohiong u ka bynrap da kaba u la kylli ba hato donkam ban punch ha ka por ba rung bad haba mih, u CEM u la ong ki nongtrei ki donkam ban punch ha ka por ba ki wan bad kumjuh ruh ha ka por ba ki leit.
U CEM u la pyntip ba ha por lyiur ka por ka dei hapoh ka 10.30 mynstep bad ka por ban mih kadei ha ka por 5 baje, hynrei ha ka por Tlang kadei naduh ka por 10.30 mynstep haduh ka por 4.30 janmiet.