Shillong, Risaw 14: Ka United Democratic Party kan ïakhun ïa ka election MP shiteng samoi na Shillong Lok Sabha bad ban tei pat naduh tynrai hadien ba 8 ngut ki MLA ki la pyniasoh ïa lade sha ka BJP, ong u general secretary ka party u bah Titosstarwell Chyne ha ka sngi Balang.
“Ngin sa iaid beit shakhmat.Mynta ngi dang pynlong ïa ki jingialang ha ki jaka bapher bapher”, la ong u bah Chyne.
U Bah Chyne u la kubur ba ki jingphet seng ki la wanrah ïa ka jingshah kath kaba jur bha ïa ka party.”Hooid ka jingphet seng jong ki ka la ktah ia ka party haduh katta katta.Hynrei haba ki la mih hi da lade ngim lah ban leh eiei ïa kane”, u la ong.
U la ong ba ka shong ha ki nongjied ne ki paidbah ban rai la ki 8 ngut ki nongthaw ain ki la shet kylla ne em ïa ka bor ba la ai sha kawei ka seng riewlum.”Ai ba ki paidbah kin bishar.Ka shong ha ki paidbah ban bishar”, la ong u Chyne.
Katkum u Bah Titos, ka kam kaba donkam mardor ka long ban pynkhlain ïa ka party, khamtam ha ki 8 tylli ki konstitwensi kiba la iehnoh thylli da ki nongkynthih dieng kper.
“Ngi hap ban wad ïa ki nongialam bad ki kyrtong kiba thymmai ban pynkhlain shuh shuh ïa ka party, ka dei ka kamram jong ka party ban lum lang ïa kino kino kiba don ha kine ki constituency kiba don bad ka UDP ban trei bad ban pynkhlain ïa ka party, ngi la sdang ban pynlong ïa ki jingialang”, u la ong.
“Ki don bun ki briew kiba kwah ban rung sha ka party, kynthup ïa kito kiba la mih na ka party, ki la pynpaw ïa ka jingkwah ban rung biang, ki briew kiba nga ïakynduh ki kwah ba ka seng riewlum kan khlain ha ka jylla, lada ki kwah ïa ka seng riewlum kaba khlain, ki hap ban iarap ban noh synniang ban pynlong ïa ka kaba khlain”, u la ong.
Haba kylli halor ka jingkynthoh jong u Bah Paul Lyngdoh ba u bah Metbah Lyngdoh u lah ban dei u briew uba khatduh eh uba dang sah ha ka UDP, u bah Titos u la ong, “Na ka bynta kata, phi lah ban kylli na u.”
Halor ki MDC Jaintia Hills, u la ong,”Nga tharai ki la ai ka jingkynthoh ba kin neh beit bad ka party.”
Halor ka lai ngut na kitei kiba phet seng kin dang bteng ne em kum ki MLA ba la sospon, u la kyntait ban kren eiei da kaba ong,”Kata ka dei ïa u Lamphang ba un ai ïa ka rai jong u.Ngam lah ban kren eiei halor ka rai jong u Lamphang, to ngin shu ap bad peit.”
Halor u Lahkmen Rymbui uba shim ïa ka shuki myntri jong ka UDP sha ka BJP, u la ong, “Kata ka mat ki la ïakren hapoh ka MDA hynrei ngam don bynta ha ka MDA, kata ka dei ka kam ba ki MLA kin ïakren, ym jong ngi.”
