Jowai, Risaw 13: Ka Jaiñtia Students’ Union (JSU), hapoh ka jingïalam u Secretary ka Education and Employment Cell jong ka JSU Central Body, u samla Bocheru Mi Pohsnem bad u Finance Secretary ka Jowai Circle, u Wansalan Dame Patwet, ki la leit kynduh ïa u Myntri ka tnad ka koit ka khiah u ma Wailadmiki Shylla, ban ïakren halor ka jingeh kaba ïadei bad ka jingpynlong ïa ki eksamin bapher bapher.
Ka jingïakynduh ka la long halor ka jingbym kynthup ïa ka Jowai kum kawei na ki jaka thoh eksamin na ka bynta ki eksamin thungkam jong ka Meghalaya Medical Services Recruitment Board (MMSRB) ïa ki kyrdan kam Staff Nurse bad Auxiliary Nurse Midwife (ANM), kiba la buh ban long ha ka 7 tarik u Naiwieng, 2026.
Ha ka jingïakren, u Myntri u la kular ïa ka seng ba ka Sorkar kan shimkhia ban peitbniah ïa ka dorkhas kaba la aiti, ha kaba la dawa ban buh ïa ka centre eksamin MMSRB ha Jowai. U la kyntu ruh ïa ki ophisar ka tnad ka koit ka khiah ba kin pynbeit ban buh ïa ka Jowai kum kawei na ki jaka thoh eksamin ha ki eksamin ban wan, khnang ba ki samla jong kin ïoh ïa ki lad thungkam kiba hok khlem da shah ktah na ka daw jong ka jingjngai jong ka jaka.
Ka JSU ka pynpaw ïa ka jingsngewnguh kaba khraw ïa u Myntri ka tnad ka koit ka khiah halor ka jingshimkhia jong u ïa kane ka kam bad ka jingkyrshan ïa ki paidbah ka Jaiñtia Hills. Ka seng ka ong ba ka jingbuh ïa ka centre eksamin ha ka thaiñ kan pynduna ïa ka jingeh ha ka liang ka pisa bad ka jingmut jingpyrkhat jong ki kyrtong ne ki candidate bad ki longïing jong ki, da kaba pyllait ïa ki na ki jinglut ha ka leit ka wan bad ki jingeh ha ka jingïaid lynti.
Ka JSU ka dang ïai bteng ban trei na ka bynta ka bha ka miat jong ki khynnah pule bad ki samla wad kam ha Jaiñtia Hills, khnang ba ki samla kin lah ban pynleit jingmut pura ha ka jingpynkhreh bad ka jingseisoh ha ka eksamin, khlem da shah pynwit ha ki jingeh kiba lah ban mih.
