Ujor ka KSU sha u Deputy Commissioner halor ka jinglip bording palat ha Ri-Bhoi
Kular u DC ban lum da ka jingïalang
Nongpoh, Risaw 13: Namar ka jingpyndik palat naka jinglip ka bording ba khah khah ha Ri-Bhoi khamtam ha sor Nongpoh, khlem don kano kano ka jingpatiaw naka bor ba dei peit khamtam ka tnad MeECL, ka Khasi Student Union, Nongpoh Circle mynta ka sngi kala leit ban ïakynduh syndon ïa u Deputy Commissioner ka Ri-Bhoi District ban ai da ka jingujor halor kane ka jingeh kaba ïakynduh da ki paidbah.
Ka seng hapoh ka jingïalam u Bah Baiashanlang Kharshanlor General Secretary kala jingdonlang ki dkhot ka seng kala pynsngew ruh sha u Deputy Commissioner ka Ri-Bhoi ba ka seng naduh u snem 2012 kala dawa da u 132/33 KV Sub-station ha Nongpoh, hynrei haduh mynta ym pat lah ban pyndep satia ban weng ïaka jingeh jong ki paidbah naka jingthud ka bording elektrik, hynrei naka liang u DC ka Ri-Bhoi u la kular ban lum da ka jingïalang bad ka tnad MeECL
Haba kren sha ki lad pathai khubor naka liang u Bah Baiashanlang Kharshanlor u la ong ba ka bording elektrik ha Nongpoh, long kumba lehkai ïarieh ka lip ka meh khlem por, watla ka seng ka la ju pyrshang bunsien ban pynsngew bad ban pynbeit ïa kane ka jingeh.
U la ong ba kane ka jingthut ka ktah ym tang ïa ki longïing hynrei ruh ïa ki nongkhaiï pateng, ki nongpynïaid ïa ki kam lajong kumba ka sorkar ka ju pynshlur ban seng kam lajong bad ha kane ka juk bun hi ki kam hap ban pyndonkam da ka bording, bad khamtam ki khynnah pule kiba dang pynkhreh ïa ki eksamin kutsnem ki bapher bapher.
Shuh shuh, u la buh jingkylli halor ka jingïapher ha ka jingthut jong ka bording hapdeng Nongpoh bad ki thaiñ ba don ki karkhana kum ka Umiam bad Byrnihat, ha kaba u la kyntu ïa ki bor ba dei khmih ban peit bñiah balei ba ka thaiñ Nongpoh ka dang mad ïa kane ka jingeh khah-khah bad ban shim ïa ki sienjam kiba donkam ban pynbeit ïa ka.
Naka liang ka seng kala kyntu ruh ïaka bor district bad ka MeECL ban shimkhia ïa kane ka kam khnang ba ki nongshong shnong ka Nongpoh bad ki thaiñ ba marjan kin ïoh ïa ka jingsam bording kaba biang bad kaba tikna khlem kano kano ka jingshah pynthud.