Nongpoh, Risaw 13: Hadien ar sngi jong ka jingwad ïa uwei u samla ba la ngam jyllop ha Wah Umtru, Byrnihat naduh ka 10 tarik mynta u bnai, ki kynhun jong ka State Disaster Response Force (SDRF) na Shillong ki la lah ban sei noh ïa ka met jong u na ki bynta ba sharum jong ka wah hynnin ka sngi nyngkong.
U tei u samla uba la ngam jyllop u dei uba la tip kyrteng kum u Bishnu Ghosh, 19 snem ka rta, na Saraibahi, Morigaon, jong ka jylla Assam. Katkum ka jingtip ba la ioh, utei u samla u la ngam jyllop ha Wah Umtru ha ka 10 tarik u Risaw, bad naduh katei ka por la pynlong ïa ka jingwad bñiah ban lap ïa ka met jong u hynrei ym shym la lap satia, bad hynnin ka sngi nyngkong bala lap noh ïa u sha ki bynta ba sharum jong ka Wah Umtru hadien ba ka um kala rah ïa u.
Hadien ba la lap ïa ka met, haka jingtohkit jong ki pulit kila lap bay m shym don kino kino ki dak mong ne ki dak mynsaw ha ka met jong u. Ki bahaïing jong u ruh kim shym la don kano kano ka jingsuba sniew halor kane ka jingjia, hynrei ki ngeit ba ka dei ka jingjia ba sngewsih kaba la jia ryngkhat na ka daw jong ka jingngam jyllop bad shah rong ha ka um. Ki bahaïing ki la kyrpad ruh ban pyllait ïa ka post-mortem, kaba la ioh jingmynjur na u Magistrate ka Ri-Bhoi District.
Hadien ba la pyndep ïa ki jingdonkam baroh katkum ki kyndon jong ka aiñ, ki pulit ki la aiti noh ïa ka met jong u samla sha ki bahaïing jong u, khnang ba kin lah ban pyndep ïa ka jingleh burom kaba khatduh ïa u.
