Ailad shwa ïa ki kali kamai jong ki trai shnong kyntu u Dy.CM ïa ki trai hotel bad homestay

Shillong, Risaw 12 : Ka Sorkar Meghalaya ka la shim ïa ki sienjam ban pynbiang ïa ki lad kamai kiba kham bun na ka kam jngohkai pyrthei sha ki kali kamai jong ki trai shnong, da kaba kyntu ïa ki hotel bad homestay ban ai bynta kham bun ïa ki ha ka kam kit ïa ki nongjngohkai pyrthei.
Ïa kane la pynbna da u Symbud Myntri Rangbah uba khmih ïa ka tnad Transport, u Bah Sniawbhalang Dhar hadien ka jingïalang bad ki nongmihkhmat na ki kynhun ki kali kamai ba kit ïa ki nongjngohkai, ki nongpeit ïa ki hotel, ki homestay bad ki nongïalam ïa ki nongjngohkai kumjuh ruh bad ki heh sorkar jong ka Tnad Tourism, u Deputy Commissioner bad u Superintendent of Police jong ka East Khasi Hills.
Haba kren bad ki lad pathai khubor, u Symbud Myntri Rangbah u la ïathuh ba la thaw ïa ka komiti kaba kynthup ïa ki nongmihkhmat jong ki kynhun kali kamai, ki hotel, ki homestay bad ki tour guide, ban wad ïa ki lad kumno ban pynlong ïa ki kali kamai jong ki trai shnong ban long ki bynta ba kongsan na ka bynta ki nongwan jngohkai pyrthei.
Ha kajuh ka por, ka Sorkar ka la mynjur ban pynbha ïa ka jaka ha Umtyngar kum ka jaka pynsangeh bad pynhiar-pynkiew nongleit nongwan kaba don ïa ki jingdonkam paidbah kiba biang, kynthup ïa ka jaka pynïeng kali, ka jaka bam, ka café bad ki painkhana.
“Kane ka jaka kan long kum ka nuksa ban bud ter ter da kiwei pat hadien. Ka tnad Transport kan sdang pyntreikam ïa kane ka projek shwa ban pyrkhat ban pynheh ïa kum kine ki jingtei sha kiwei pat ki jaka,” u la ong.
U la pyntip ruh ba ka shnong ka la tyrwa ban ai ïa ka jaka khlem da shim dor, katba ka jingtei bad pynkhreh ïa ka jaka kan long ka kamram jong ka tnad Transport.
Haba kren halor ka jinglong jingman jong ka kam jngohkai pyrthei, u Symbud Myntri Rangbah u la ong ba watla ka jingwan jong ki nongwan jngohkai ka la hiar khyndiat ha kine ki por ba la dep, hynrei mynta ka la sdang ban kiew biang. U la pynpaw ka jingsngewskhem ba ka jingïalang bad ki sienjam ba la shim kin ai mynsiem shuh shuh ïa kane ka kam, watla ka jingkylla kan ym wan tang hapoh shisngi.
Ha kaba ïadei bad ka jingshngaiñ jong ki nongjngohkai, u la ong ba ki pulit kin pynlong ïa ka jingpeitngor kaba man ka por, 24 kynta ha ka Sohra tourist circuit, bad yn buh ïa ki CCTV camera ha ki jaka ba kongsan, kynthup ïa ki homestay.