Ha kane ka taïew yn pynlong ïa ka tamasa ha Markham kyntu ki bor District ïa ki paitbah ban ïatreilang

Mairang, Risaw 12 : Ka Markham dei ka jaka kaba itynnad bha kaba hap ha Eastern West Khasi hills district kaba la khring ïa ki nongshangkai suwari na kylleng ki ki jaka kiba napoh ka jylla bad na shabar ka jylla ruh ban leit peit ïa ka jingitynnad jong ka. Kumta na ka bynta ban khring shuh shuh ïa ki nongshangkai suwari bad mynta u snem yn pynlong ïa ka tamasa ha katei ka jaka ka ban sdang naduh ka sngi thohdieng ka 16 tarik mynta u bnai bad yn pynkut ha ka sngi saitjaiñ ka 17 tarik Risaw.
Kumta na ka bynta ban pynïaid beit ïaid ryntih ïa katei ka tamasa ki bor pynïaid distrct jong ka Eastern West Khasi hills ryngkat ki rangbah kur jong ka kur Lyngdoh Nonglait kiba dei ki trai jaka ki la kyrpad ïa ki paitbah kiba leit sha katei ka tamasa ba kin ïatrei lang khnang ban lait na kino kino ki jingklumar. Ha katei ka tamasa kin don bun jait ki jingïalehkai ki ban pynbyrngia bad pynsgewtynnad ïa ki paitbah.
Ha kaba ïadei bad ka jingdon jong ki jaka kiba itynnad bad kiba khring ïa ki nongshangkai suwari ka Eastern West Khasi hills ka dei ka district kaba don bun ki jaka kiba khring ïa ki nongshangkai suwari ym tang namar ka jingitynnad jong ki hynrei ki dei ruh ki jaka kiba don nam bad kiba don ïa ki khana bad ki jingjia kiba baroh ki tip lyngba ki khana pateng ba la ïathuh da ki longshuwa bad kba la buh ruh da ki jingthoh ha ki kot pule kum u lum Kyllang, ka Phan Nonglait falls kaba la kylla long mynta kum kawei na ki jaka jngohkai kiba paw ha ka jylla.
Nalor kata kiwei pat ki jaka kiba itynnad kum ka Rilang Viewpoints, Remkhla valleys project , Mawhiang rock uba la jutip kum uta u “giant rock’ uba don shaphang shatei na ka shnong Mawkyllei , ka dom Marweiñ kaba don ha Wahliewlong kaba khring bha ïa ki nong leit shangkai suwari.
Na ka jingdon jong kitei ki jaka kiba itynnad ka sorkar lyngba ka tnad jngohkai ka la dei ban phai khmat kham kyrpang sha ka Esatern West Khasi hills ban pynbiang noh ïa ka ophis trei kam ryngkat u ophisar uba dei peit ïa ka kam jngohkai na ka bynta ban kyntiew ïa ka ïoh ka kot bad ka kami kajih jong ki paitbah hapoh ka district.