Jowai, Risaw 12: Ka District Hub for Empowerment of Women (DHEW), West Jaiñtia Hills hapoh ka tnad Social Welfare kala pynlong ïaka ‘International Day of Girl Child cum Adolescence Mela’ hapoh ka Beti Bachao Beti Padhao, ha Dulong Community Hall, Jowai.
La pynlong ïa kane ka prokarm halor ka phang “End Child Marriage and Invest in Girls’ Rights,” ha kaba la pynsngew ïaki lad jingïada ïa ka hok jong ki khynnah kynthei, ban khanglad ïa ka jingshongkha khynnah bad ban pynkupbor ïa ki kynthei lyngba ki prokram pynsngewthuh bad ki lad jinghikai bapher bapher.
Ka Chief Judicial Magistrate-cum-Secretary, District Legal Services Authority, WJH, kong D. G. Kharshiing, MJS kala long kum u Kongsan, katba ka ophisar ba dei peit ïaka Jowai Women Police Station SI kong I. Kharpran kum ka symbud kongsan, kiwei de kiba la donlang ki kynthup ïa u ma S. Kyndiah, Assistant Waheh Shnong ka Dorbar Shnong Dulong, ki ophisar na ka tnad Social Welfare bad ki samla pule.
Naka liang ka kong Kharshiing haba ai jingkren kala ban jur ïa ka jingdonkam jong ka jingpule khnang ban pynkupbor ïa ki khynnah kynthei bad ban pynbha ïa ka lawei jong ki. Kala pynshlur ïa ki samla pule ban bteng ïaka jingpule da ka jingaiti lut met bad mynsiem ban ïoh ïa ka thong haka jingim jong ki.
Ïaka jingbatai halor ka jingïada ïa ki khynnah kynthei bad ka jingshngaiñ jong ki, naka liang ka kong I. Kharpran kala kyntu bad pynsngewthuh halor ka rukom pyndonkam haka liang ka online bad ki social media. Kala maham ruh halor ki jingma kiba mih naka online bad kiba lah ban pynsaphriang ïa ki dur bad ki video shimet, da kaba kyntu ban tip bha kumno ban pyndonkam ïa ka technology da ka jingshemphang.
Kala batai shuh shuh shaphang ki jingjia shah lehbeiñ jong ki kynthei khynnah bad la kyntu ba kin pyntip mar mar sha ki pulit ne ki bor ba dei peit khlem da pynslem.Kala batai ruh shaphang ki lad jingïada ïa ki khynnah khynthei lyngba ki kyndon aiñ, kynthup ïa ka POCSO Act.
Ha kane ka sngi la sam ruh ïa ki khusnam sha ki nongjop haka jingïakop thoh essay.
Shi bynta na kane ka prokram la pynlong ruh ïa ka Mela jong ki samla, ha kaba la buh ïa ki Stall bapher bapher da ka tnat District Child Protection Unit halor ka jingshngaiñ bad jingbit jingbiang jong ki khynnah, katba ka tnad ka Koit ka Khiah kala pynlong ka jingpeit bniah ïaka jingduna snam bad ka jingai jingmut ïa ki samla.
