Shillong, Risaw 12 : U Symbud Myntri Rangbah ka Meghalaya, u Bah Sniawbhalang Dhar ha ka sngi Nyngkong u la pynpaw ïa ka jingshaniah jong u ha ki samla ka jylla, da kaba ong ba ki samla ka Meghalaya ki don ka jingshemphang ban shim ïa ki rai kiba dei na ka bynta ka lawei jong ki.
Haba jubab halor ka jingkylli, u Symbud Myntri Rangbah u la ong ruh ba ka jingïakhih jong ka Cockroach Janata Party (CJP) kan ym ktah satia ïa ki samla ka jylla.
Haba kren sha ki lad pathai khubor ha ka Sngi Nyngkong halor ka jingktah kaba lah ban mih na ka jingïakhih jong ka CJP, u Symbud Myntri Rangbah u la ong, “Ki samla ka Meghalaya ki long ruh kiba shemphang bad kiba lah ban pyrkhat jngai ban shim ïa ki rai kiba donkam ha ka jingim jong ki. Ka Sorkar jylla ka ïeng ryngkat bad ki samla bad ka burom ïa ka sur jong ki.”
U la bynrap ba ka Sorkar ka dang ïai bteng ban ai jingkyrshan ïa ki samla, da kaba pynpaw biang ïa ka jingshaniah jong u ha ka jingstad bad ka bor jong ki ban rai ïa ka lawei jong ki
Shuh shuh u la ong ba um don jingsngewkhia halor ka jinglong jingman jong ki samla ha kane ka bynta, namar u ngeit ba ki samla ka Meghalaya ki tip bha ïa kaei kaba ki dei ban leh na ka bynta ka lawei jong ki.
Haba kylli halor ka jingdawa kaba mih ban weng ïa u Chief Election Commissioner (CEC), na ka liang u Symbud Myntri Rangbah u la kyntait ban kren ei ei halor kane hynrei u la shu ong ba ka Sorkar Pdeng kadei kaba biang ban jubab halor kane ka bynta.
