Yn pynkhlaiñ ka jingpahara na bynta ka Durga Puja ban pynthikna ïa ka suk ka saiñ – SP

Shillong, Risaw 12 : Ki pulit jong ka East Khasi Hills kin pynthikna ba ka jingshngaiñ kan don ha baroh ki jaka khnang ba ka jingrakhe ïa ka Durga Puja ha Shillong kan long kaba ïaid beit bad khlem kano kano ka jingkulmar, la ong u Superintendent of Police (SP), u Bah Vivek Syiem, ha ka Sngi Nyngkong.
“Ngi la pan ban ïoh shuh shuh kham bun ki pulit, bad yn pynthikna ba ki pulit bad ki lad jingïada kiba biang kin don ha man la ki jaka,” u la ong haba kren bad ki lad pathai khubor.
U la ong ba ki dang bishar bniah ïa ka jingdonkam jong ki pulit bad haduh katno ngut ki pulit yn donkam.
Shuh shuh u la ong ruh, “Haduh mynta, ym pat shim ïa ka rai kaba khatduh halor ka jingdonkam jong ki pulit. Ngi dang pynbeit ïa kane, bad ngi dang don por bad ngin dang bishar biang ïa ka jinglong jingman na ka por sha ka por.”
U SP u la ong ba kin sa lum ïa ki pulit na kylleng ka jylla, nalor ki pulit CRPF kiba la don lypa na bynta kane ka kam.
Haba jubab halor ka jingkylli u la ong, “Haduh mynta la biang tang ki pulit jong ka jylla namar ngi la don lypa ïa ki pulit CRPF, hynrei ngi dang lum shuh shuh ïa ki pulit na kylleng ka jylla.”
Haba kren halor ki jingpynkhreh, u SP u la ong ba ki ophisar kiba peit ïa ki sector bapher bapher ki la dep pynlong ïa ki jingïalang bad baroh kiba don bynta ban pynthikna ba ka jingrakhe kan ïaid beit ïaid ryntih.
Shuh shuh u la ïathuh ba la dep ai ruh ka jingbthah ban buh ïa ki CCTV camera bad ban shim ïa ki lad jingïada na ka jingkem ding.
La pynleit jingmut kyrpang ruh ban lait na ki jingjia ba ki khynnah kin jah bad ban tehlakam ïa ki jingjia aksiden.
Nalorkata, u la ong ba la dep ruh ban bthah ïa ki Puja Committee ban pynbeit ïa ki nongtrei mon sngewbha ban trei lang bad ka Shillong Traffic Police ha ki pandal kiba heh bad ha ki jaka kiba kongsan.