SHILLONG, Risaw 12: Ka Meghalaya Amateur Kabaddi Association (MAKA) ka la pynkut noh ïa ka State Junior Kabaddi Selection Trial and Training Camp na ka bynta ki khynnah shynrang bad kynthei kiba hapoh 20 snem ha ka 10 tarik Risaw 2026 ha BSF Indoor Stadium, Umpling, Shillong.
ïa kane ka prokram la pynlong naduh ka 05 tarik haduh ka 10 tarik u Risaw 2026 ban ithuh bad jied ïa ki samla ïalehkai kiba tbit ban mihkhmat ïa ka jylla Meghalaya ha ka 52nd Junior National Kabaddi Championship 2026.
Ha ka jingïalang pynkut la wan kongsan da ka kong Ampareen Lyngdoh, MLA ka Laitumkhrah, ha ka jingïadon lang u Rakesh Kumar Sharma, Commandant, BSF kum u symbud kongsan.
Haduh 80 ngut ki nongïalehkai na ki district bapher bapher jong ka jylla Meghalaya ki la wan ban ïashim bynta ha kane ka prokram. Hapoh ka jingïalam jong ka kynhun nonghikai, ki nongïalehkai ki la ïaid lyngba ki jinghikai bapher bapher, ha kaba la bishar ïa ka buit, ka jingstet, ka bor met, ka jingïatrei lang hapdeng ki kynhun jong ki nongïalehkai.
Ka kynhun jong ki coach ka kynthup ïa u Arjun Tevathiya, Dushyant Sanjay Berwal, Lurshai L. Rympei bad u Mewan Phawa, kiba la kyrshan ïa ka jingpynkhreh, jinghikai bad jingbishar kaba bñiah ïa ki nongïalehkai kiba ïashim bynta.
Hadien ka prokram jied, ka Technical Committee ka la jied ïa ki 28 ngut ki nongïalehkai, kiba kynthup ïa 14 ngut ki shynrang bad 14 ngut ki kynthei, ban mihkhmat ïa ka Meghalaya ha ka National championship ban wan.
Ka kynhun jong ki khynnah shynrang kiba la shah jied kin ïashim bynta ha ka 52nd Junior National Kabaddi Championship ha Patliputra Sports Complex, Bihar, naduh ka 01 tarik haduh ka 04 tarik Naiwieng 2026, katba ki khynnah kynthei kin ïakhun ha Nehru Stadium, Faridkot, Punjab, naduh ka 26 haduh ka 29 tarik Naiwieng 2026.
Ka MAKA ka la pynpaw ruh ïa ka jingsngewnguh ïa ki bor pynïaid jong ka BSF Meghalaya kiba la ai ka jingkyrshan ban pynbiang ïa ka jaka, kumjuh ruh ïa ki Dkhot jong ka synjuk, ki coach, ki Technical Committee, ki nongïalehkai ba ïashim bynta, ki skul, ki kmie ki kpa kiba la noh synñiang ban pynlong ïa kane ka prokram kaba jop.
Ka Association ka la pynskhem biang ïa ka jingangnud jong ka ban kyntiew ïa ka jingïalehkai Kabaddi ha Meghalaya, ban pynroi ïa ki sap ïalehkai bad ban plie lad ïa ki samla trai ri ban ïashim bynta ha ki lympung ïalehkai ha ka kyrdan jong ka ri.
Kane ka long katkum ka kyrwoh na u na u General Secretary-bah Manbhalang Kharkamni.
