Jowai, Risaw 12: U samla Mayalang Pakem 24 snem, uba na Mynthong, Jowai, u la lah ban wanrah ïa ka nam bad burom ïa ka ïing ka sem, ka nongbah Jowai, ka District ka jylla bad ka ri hi baroh kawei, ha kaba ula long u nongjop ne u lahduh (Gold medalist) ha ka lympung jingiakop 2nd Mr & Miss Asia Bodybuilding Championship, Senior Men Body Building 55Kg category, kaba la pynlong ha Shri Arubindu Institute, Shillong Myghalaya ha kane ka sngi Saitjaiñ jong ka 10 tarik mynta u bnai Risaw.
La pdiang bad pynkup burom ïa u Mayalang Pakem ha ka janmiet jong ka sngi U Blei katba u dang wan phai na nongbah Shillong sha nongbah Jowai, ha ryngkat ka jingpynkup burom kaba shongkun kaba la shim bynta da ki paralok kiba kynthup ruh ïa u ma Heibor Pariat uba ju ai mynsiem ban kyntiew ïa ki samla ha ka liang ka jingïalehkai sports, u samla Ebenezer Sutnga uba juh kyrshah ïa ki samla kiba don sap ha kiba bun ki bynta, ha ka jingdonlang ki kmie ki kpa bad kiba haïing hasem jong u samla Mayalang.
U samla Mayalang Pakem haba ai jingïakren sha ki lad pathai khubor, ha kaba nyngkong eh u la pynpaw ka jingsngewnguh ïa U Blei uba la don ryngkat bad u haduh ba u la ïoh ïa kane ka jingjop ha kane ka jingïakop, kumjuh ruh u la pynpaw ka jingsngewnguh ïa kiba haïing hasem jong u kiba la kyrshan ïa u na ka por sha ka por bad u Coach jong u, uba la hikai bad lam lynti ïa u ban poi sha kane ka jingjop.
U samla Pakem u ong ruh ban poi sha ka jingjop ne ban ïoh rah ïa ka nam lahduh, kam dei kaba suk, namar u la ong kaba nyngkong ka dei ka jingtrei shitom bad ha kum kane ka jingiakop ne ka jingïalehkai, hap ban pynkhreh bha na ka bynta ka met ka phad, naduh ka rukom bam rukom dih dei ban bud katkum ka rukom thik pa thik, u la ong ba na ka liang jong u hi u la aiti 100 na ka 100 ka jingtrei shitom jong u na ka bynta kane ka jingïakop.
Shuh shuh u la ong ba haba ïaid lynti ha kano kano ka kam ne ha ka jingïalehkai sports, hap ban mad shibun ki jingeh, kumta dei ban long ne don ka jingïaishah bad ka jingtrei shitom. U la ong nalor ka jingtrei shitom bad ban pynbit pynbiang ïa ka met ka phad, donkam ruh sa ka pisa na ka bynta ban leit ïashim bynta ha ki lympung ïakop bapher bapher kiba sha jngai, kiba sha kiwei pat ki jylla ne ki ri. U la ong ruh ba ha une u snem ban wan u sa leit ban ïashim bynta sha bar ri kumta u donkam ka jingïarap ha ka jingïadei bad ka baileit baiwan, kumta u kyrpad ruh ïa ka sorkar ba kan ai ka jingïarap bad kyrshan sha kino kino ki samla kiba don ka sap ka phong ha ka liang ka jingïalehkai sports bapher bapher, khang ba ki nanglah ban ïaid shakhmat na ka bynta ban wanrah ïa ka nam bad burom ïa ka ri bad ka jaitbynriew.
Ha ka jingïadei bad ka jingjop kane kam dei ka sien kaba nyngkong ïa u samla Mayalang Pakem, ban wanrah ïa ka nam bad jingjop, hynrei u la juh rah ruh ïa ka nam Mr. Ironman Amateur 2025, ha ka jingïakop 60 weight category kaba la pynlong ha Jowai, District Library, u la jop ruh ha ka Body Build Championship, kaba la pynlong da ka Meghalaya Body Builders Association ha u snem 2025, kumjuh ruh ha ka FIT India bad dangdon kiwei de ki jingïakop kiba u la shim bynta.
Na ka liang u Mayalang Pakem u la ai mynsiem ruh ïa kiwei de ki para samla kiba don ka sap ka phong ha kano kano ka jingïalehkai sports ba kin long kiba trei shitom na ka bynta ban wanrah burom ïa ka ïing ka sem kumjuh ruh ïa ka ri bad ka jaitbynriew bad kaba long ruh ka jingmyntoi ïalade hi shimet.
