Risaw 10: U Cristiano Ronaldo u la wanphai biang sha ka jingïalehkai phutbol jong ki klob ha ka sngi Thohdieng hadien ka jingïakynad bad ka Portugal, ha kaba u la thep ïa ka kol ba nyngkong katba ka Al-Nassr ka la pynliem ïa ka Diriyah da 3-0 ha ka Saudi Pro League.
Kane ka jingjop ka pynlong ïa ka Al-Nassr kaba dang ïada ïa ka nam lahduh ban ïaryngkat poiñ hadien jong ka Al-Qadsiah, kaba lamkhmat ïa ka miej da tang ka jingïapher kol ha ka kylla ïakhun kaba phra jong ka League.
Ha ka por jong ka FIFA International window, u Ronaldo, uba 41 snem ka rta, u la mih noh na ka kynhun ïalehkai jong ka Portugal namar ka jingbym ïa sngewthuh jingmut hapdeng jong u bad u coach. U Ronaldo u la thep 146 tylli ki kol ha ki 234 tylli ki jingïakhun na ka bynta ka Portugal.
Ha ka kyrwoh jingpynbna kaba jrong kaba la pynmih ha ka sngi Ba-ar, u Ronaldo u la ong ba u coach ba dang shu thung dang shen u Jorge Jesus um shym la pyndep hok ïa ka jingkular jong u shaphang lano un pynmih madan ïa une u snar thep kol ha ka Nations League.
U Ronaldo u la jop ïa ka nam lahduh jong ka Saudi Arabia ha u bnai Jymmang ha ryngkat u Jesus kum u coach jong ka Al-Nassr bad u la pynkhihjar ha ka minit kaba 23 ha ka jingïakhun hynnin ka sngi Thohdieng, ban kyntiew ïa ka jingkheiñ sha ki 980 tylli ki kol baroh.
Ki ar tylli kiwei pat ki kol la thep da u Samu Costa (35’) bad u Kingsley Coman (76’).
