Paw ka jingshlur bad ka sap ki samla na Ri-Bhoi ha ka District Level CMYEP, 91 ngut yn leit shimbynta sha ka State Level

Nongpoh, Risaw 08: Ka 5th District Level Chief Minister Youth Engagement Programme 2026 bala pynlong ar sngi lynter ha Parish Hall Nongpoh kala long kawei naki rynsan ïashim bynta jong ki samla ban pynpaw pyrthei ïaki sap bapher bapher la ka long haka put ka tem, ka rwai ka siaw, ka dro dur, bad shibun kiwei kiwei bad lyngba kane ka prokram kala long shisha ka jingmyntoi bad ka jingkyrkhu kaba khraw ïaki samla pule na kylleng ka district bad ki block bapher bapher kiba la wan ban ïashim bynta.
Ïa kane ka District Level Chief Minister Youth Engagement Programme la pynlong da ka ophis u District Sports Officer, Ri-Bhoi haka jingïatreilang bad ka ophis u Deputy Commissioner ka Ri-Bhoi ba la sdang naduh ka 6 tarik Risaw bad la pynkut noh haka 7 tarik Risaw halor ka phang “Young Meghalaya, Shaping Tomorrow” bala wan ban plie paidbah da u Dr Abhishek Saini Deputy Commissioner ka Ri-Bhoi bad la pynkut bad pynhap pyrda pat da u Bah Mayral Born Syiem MLA ka Nongpoh.
La sakhi ruh ha kane ka sngi da jingdonlang u R Brahma, ka kong B Ranee kiba dei ki Additional Deputy Commissioner ka Ri-Bhoi, Bah Boby L Nongbet District Sports Officer bad kiwei kiwei ki riew rangbah ryngkat spah ngut ki samla na kylleng ka district kiba la wan ban ïashim bynta.
Ha kine ki ar sngi ki samla kila ïoh kabu ban pyni ïaka jingshlur, ka sap kaba ki don, lyngba ki jingïakop bapher bapher bad kumba 91 ngut ki samla naka district kila ïoh ka lad bad shah jied ban leit ïashim bynta pat sha ka State Level ka ban sa long shen ha nongbah Shillong.