Shillong, Risaw 08: Ka Joint Action Committee Against The Shillong Ropeway Project and for The Protection of Lum Shyllong Catchment (JACSRPPLSC) ka la pynbna paidbah, bad ïa ki nongshong shnong ka Shillong, ki nongkyrshan ba ka Peaceful Rally kaba la buh ban pynlong ha ka 10 tarik mynta u bnai la pynkynriah noh sha ka 17 tarik mynta u bnai.
Kumba la kdew ka JAC ka ïathuh ba kane ka jingïaid paidbah kaba jai jai la thmu ban pynlong ban pynpaw ka jingsngewkhia halor ka jingtyrwa ban shna ïa ka Shillong Peak Ropeway Project bad ban banjur ïa ka jingdonkam ban ïada ban pynneh pynsah ïa ki tyllong um ba don ha u Lum Shyllong.
Ha ka 17 tarik, kaba dei ka sngi saitjaiñ, ka Rally kan sdang ha ka por 10 baje mynstep na Last Stop Market Main Road sha ka jaka ba thmu ban shna ïa ka Shillong Ropeway Project, kaba ha Madan Laban.
Ka JAC ka kyrpad ïa kito kiba kyrshan ba kin khmih ïa kane ka tarik ba la pynkynriah bad ba kin pynïar ïa ki jingïashim bynta jong ki ha kane ka jingïaid rally kaba jai jai khlem da pynmih kino kino ki jingbym lah ban pdiang ha ka imlang sahlang, kin wan da kaba jai jai bad ban kiar na ki jingpynmih kiba ktah ïa ka suk ka saiñ hynrei ban shim bynta kum ha ka kam riti synshar paidbah, ong ka kyrwoh na ka President ka Kong D Marbaniang bad ka Secretary Dr. L Marbaniang.
