Shwa ban shimti ka MDA ïa ka sorkar da ki hajar khlad ki khunlung man u snem: Dy.CM

Shillong, Risaw 07: Ka Meghalaya ka la duh da ki hajar ngut ki khunlung manla u snem namar ka jingduna ki doktor, dawai bad ki jingdonkam ha ki jaka sumar, hashwa ba ka Sorkar MDA kan shimti ïa ka jingsynshar ha u snem 2018, la ong u Symbud Myntri Rangbah ka Jylla, Bah Sniawbhalang Dhar.
Haba kren ha ka jingïalang ïalap elekshon MP shiteng samoi ha Nongspung na ka bynta u kyrtong ka NPP u Dr. DRL Nonglait, na ka liang u Bah Sniawbhalang u la ong ba ka sien kaba nyngkong eh hadien ba ka Kynhun Myntri ka la shimti ka long ban wad ïa ki jingtip shaphang ka koit ka khiah, bad kaei kaba ki la ïohi ka long kaba pynkyndit.
“Ki long tang ki nuksa kiba rit, mynta man la ki dong bad ki bynta ki don CHC, Sub-Centre,” u la ong.
U la ong ruh ba ka jingbun ki khunlung kiba khlad ha kito ki por ka la pynbor ïa ka Sorkar ban pyrkhat thymmai ïa ki mat kiba kongsan.
“Ngi la ong, ka jingmyntoi aiu ban ïoh ïa ki surok, ki skul, lada da ki haja ngut ki khunlung ki ïap manla u snem. U Myntri Rangbah u la pynmih ïa ka Motherhood Scheme tang na ka bynta ki kmie jong ngi,” u la ong.
Katkum ka jingong jong u, hapoh kane ka skim, ki ASHA ki buddien ïa baroh ki kynthei ba armet bad pynthikna ba kin ïoh ïa ka jingpeit bniah ïa ka koit ka khiah ha ka por kaba biang bad ba kin kha ruh ha ki jaka sumar.
“Ngi pynlut da ki spah klur tyngka khnang ba ki kmie kin long kiba koit ba khiah bad ka jingkha khun kan long ha ka por kaba dei. Kane ka prokram ka la ïoh ïa ka kyrdan kum kawei na ki polisi ka koit ka khiah kiba bha tam na u Myntri Rangbahduh jong ngi,” u la ong.
Shuh shuh u la kdew ruh ïa ka jingkiew ha ka liang ka umbam umdih hapoh ka JJM, na tang kumba 10,000 tylli ki jingpynpoi um lyngba ki pipe sha ki ïing ha ki nongkyndong, sha palat 4 haduh 5 lak tylli hapoh kine ki snem.
“Kine ki long ki jingshisha bad ki jingkheiñ. Nga ïathuh ïa phi kum u Symbud Myntri Rangbah, khnang ba phi paidbah phin tip katno kane ka Sorkar ka la leh,” u la bynrap.