KOLKATA, Risaw 07: Ka India ka la pynkut ïa ka jingïalehkai International Window jong ka FIFA da ka namrem haduh 6-1 kol ha ka Uruguay hynnin ka miet sngi Ba-ar ha Vivekananda Yuba Bharati Krirangan, Kolkata.
Watla kata ruh, ka India ka la ïohlad ban pynkhihwin shipor ïa ka jingïakhun hadien ba u Anirudh Thapa u la thep ïa ka kol pynïakhaid ha ka minit kaba 22, kaba la pynkmen ïa ki 37,307 ngut ki nongpeitkai.
Kumba katto katne por ha kane ka jingïalehkai, ka India ka la wanrah ïa ka jingïakhun kaba tyngeh pyrshah ïa kane ka ri kaba la jop ar sien ïa ka nam lahduh ha ka pyrthei hashwa ba ka jingïalehkai kan shah pynsangeh namar ka jingjur u leilieh. Haba la sdang biang ïa ka jingïalehkai, ka Uruguay ka la thep jlang bad jlang bad pynliem syndon ïa ka India haduh 6-1.
Wat hapdeng ka jingshah rem, ka kol pynïakhaid ba shipor jong u Thapa ka long ka bynta jong ka histori jong ka phutbol India. U la kylla long tang u nong India uba ar ban thep kol pyrshah ïa ka Uruguay ha ka jingïalehkai phutbol ba la rangbah, hadien u Manas Bhattacharya, uba la pynkhihjar ha ka jingïakhun ba ka India ka la shah rem da 3-1 kol ha Eden Gardens ha ka Nehru Cup ha u snem 1982.
Ka Uruguay ka la thep ïa ka kol lamkhmat na ka penalty. U Pramveer u la pynur ïa u Federico Viñas hapoh phyllaw kol, bad u referee Rustam Lutfullin u la kdew beit beit sha ka penalty, ha kaba u Darwin Núñez (11’) khlem jingbakla u la lah ban thep.
Nangta u Maximiliano Araújo (28′ & 59′) u la pynkhihjar ha baroh ar tylli ki kylla ban thep ar kol, katba u Rodrigo Zalazar (53′), u Juan Manuel Sanabria (71′) bad u Rodrigo Aguirre (86′) ki la bynrap mar shi kol na ka bynta ka Uruguay.
Kumta ka India ka la pynkut ïa ki lai tylli ki jingïalehkai paralok da kaba ïakhaid pyrshah ïa ka Panama (1-1) bad shah rem noh ha ka Brazil (4-0) bad ka Uruguay (6-1). Ka kynhun ka la ïohlad ban thep tang ar sien bad shah thep 11 kol ha kine ki jingïakhun pyrshah ïa ki lai tylli ki ri kiba ïakhun ha ka World Cup 2026.
Ki rangïalehkai ka India kiba la mih madan pyrshah ïa ka Uruguay: Gurpreet Singh Sandhu (Albino Gomes 78′), Abhishek Singh Tekcham (Mohammed Sanan 65′), Pramveer (Bijoy Varghese 46′), Anwar Ali, Akash Mishra, Anirudh Thapa, Lalengmawia (Ricky Shabong 78′), Manvir Singh (Rahim Ali 78′), Ryan Williams, Edmund Lalrindika (Sahal Abdul Samad 46′), Ashique Kuruniyan (Hmingthanmawia Ralte 65′).
