Ïalam u Manager ïaki khynnah skul hapoh ka FCI FSD Jowai

Jowai, Naitung 30 : Ki khynnah skul jong ka Khleihtyrshi Secondary School West Jaiñtia Hills District hynin ka sngi kila ïoh jingbatai bniah na u bah D.R. Manih uba dei u Manager (D)/Depot incharge ka Food Corporation of India (FCI), Food Storage Depot (FSD) Jowai kaba don ha ka shnong Khliehtyrshi WJHD.
Na ka liang utei u Manager ula pynsngew ba kane ka long shi bynta na ka jingrakhie ïa ka jingdap 75 snem ka ri ne ka ‘Azadi Ka Amrit Mahotsav’ bad u kyrmen skhem napdeng jong kine ki khynnah skul kin sa long kum ki nongtrei ban lum jingkheiñ hapoh kane ka jaka buh ïa u khaw sorkar.
Kane ka FCI FSD Jowai ka dei kawei na ki jaka buh ïa u khaw uba wan pynpoi na ka sorkar kmie naka bynta ban pyndap pynbiang ïa ka bam ka dih jong ka District hi baroh kawei, ha kane ka sngi kitei ki khynnah skul kila ïoh jinghikai shibun eh na utei u Manager jong ka FCI FSD Jowai, uba la ai ka jingbatia ïa ka rukom lum jingkhieñ jingdiah ïa u khaw naduh ka rukum thew ïa ki kali (trok), ka jingkhia jong u khaw na ka trok bad ka jingbha jong u khaw hashwa ban pynrung hapoh katei ka jaka buh khaw Depot.
Nangne la ïalam ruh ïa ki khynnah skul shapoh ka kudam ban sakhi dala ki jong ki khmat ïa ka rukom buh ryntih ïa u khaw katkum ki jingkheiñ khnang ba yn ïoh tip ïa ka jingdon jong u khaw ha manla kawei pa kawei ka Chamber bad kaen ka ïarap ban ai jingtip lada wan jurip jong ki bor ba halor.
La ai jingtip ruh sha ki khynnah skul ha kaba ïadei bad ka rukom lum jingkhieñ ïa ka closing Account da ki kor Computer bad la ai jingbatia ruh shaphang ki lad jingïada ïa u khaw na ka jingwan poi jong ki khnai.