Da ka jingkynduh lang jong baroh ki MLA jubab ka NPP ïa ki khubor kynshoit ha social media
Shillong, Risaw 06 : Ka National People’s Party (NPP) ha ka Sngi Ba-ar ka la pyni ïa ka jingïatylli hapoh ka party, hadien ba baroh ki nongmihkhmat ki la kynduh lang ha ka jingïalang kaba la lum da u President Rangbah ka NPP bad Myntri Rangbah ka Jylla, Conrad K Sangma, ha Shillong.
Ha kane ka jingïalang la ïadonlang naduh u State President ka NPP bad Symbud Myntri Rangbah, Bah Prestone Tynsong nangta u Symbud Myntri Rangbah bad nongïalam ka party Bah Sniawbhalang Dhar, ryngkat bad baroh ki MLA ka NPP.
Ka jingwan lut jong baroh ki MLA ka wan ha ka por ba ki la mih bun ki khubor ha ki rynsan social media kiba kynnoh ba ka don ki jingïapher jingmut hapoh ka party bad ka jinglah ban don ki MLA kiba thmu ban pynkylla ïa ka jingïadei jong ki bad ka NPP.
U Myntri Rangbah Conrad K Sangma u la kyntait bunsien ïa kine ki jingkren, da kaba ong ba ka NPP ka dang long kawei bad ba un ym kren halor ki khubor saiñpyrthei khlem ki jingshisha kiba lah ban pynshisha.
U President ka NPP ha jylla bad Symbud Myntri Rangbah, Prestone Tynsong, ruh u la kyntait ïa ki khubor ba ka BJP ka pyrshang ban pynpra ïa ka NPP. U la ong ba “ym don satia kum kata ka jingpyrshang” bad u la pynskhem ba ka sorkar MDA kan pyndep ïa ka samoi treikam kaba pura.
U National General Secretary ka NPP bad Symbud Myntri Rangbah, Bah Sniawbhalang Dhar, pat u la ïai ong ba baroh 33 ngut ki MLA ka NPP ki dang ïatylli bad long lang kawei ka bor, da kaba kyntait ïa ki khubor ba don ki MLA kiba thmu ban pynïasoh sha ka BJP.
La ong ruh ba ka jingïalang ha kane ka sngi ka la pynskhem shuh shuh ïa ka nongrim jong ka seng ba ki MLA ki dang tylli lang hapoh ka jingïalam jong u Conrad K Sangma.
Ka jingïalang ka la ai ruh ïa ka kabu ïa ki nongïalam ka party bad ki MLA ban ïakren halor ki kam ba ïadei bad ka party bad ban pynskhem biang ïa ka jingmut jong ki ban pynkhlaiñ ïa ka NPP bad ka sorkar MDA.
Da kaba baroh ki MLA ka NPP ki la wan ïashim bynta ha ka jingïalang, ka party ka la pyrshang ban pynkut noh ïa ki jingkynnoh kiba ïaid ha ki rynsan social media shaphang ka jingdon ki jingïapher ne jingïapait hapoh ka seng.