Nongstoiñ, Risaw 06: Ha ka sngi hatmajai jong ka taiew, ka District Legal Services Authority (DSLA) West Khasi Hills District Nongstoiñ, hapoh ka jingïalam jong ka National Legal Services Authority (NALSA), ka la pynlong ïa ka prokram ai jingpynshai halor ki aiñ bad ka jingsumar ïa ka koit ka khiah, kaba long ruh shibynta jong ka sngi kyrpang ki riew tymmen shi tyllup ka pyrthei.
Kane ka prokram kyrpang na ka bynta ki riew tymmen la pynlong ha Riangdo Auditorium Hall Mawshynrut C&RD Block, ha kaba ka jingthmu ba kongsan hi ka long ban pynsngewthuh ïa ki tymmen shaphang ki hok ha khmat ka aiñ, ki hok ban ïoh ïa ki jingïarap bapher bapher. Ka jingïoh ïa ki jingshakri aiñ khlem jingsiew, ryngkat ban ai ïa ki jingïarap ha ka liang ka koit ka khiah bad ban kyntiew ïa ka jingim kaba kham bha jong ki.
Ka kynhun jong ka DLSA lyngba ki Legal Aid Counsel (LAC), ki la ai ïa ki jingtip kiba kongsan shaphang ki jingshakri aiñ lane ka ‘Legal Aid’, kiba lah ban ïoh da ki briew kiba bit ban ïoh, kynthup ïa ka jingïarap ban ïoh jingmut na ki nongai jingshakri aiñ bad ka jingïoh nongïasaid ha ki kam aiñ.
Nalor nangta, la pynshai ruh ïa ki nongshimbynta ba ka jingshakri Legal Aid ka don na ki Legal Services Authorities na ka bynta ki briew kiba bit ban ïoh, khnang ba kin lah ban wad ïa ka hok khlem da shah khanglad na ka daw jong ka jingeh pisa.
Shuh shuh, ki nongkren ki la pynsngewthuh ruh ïa ki nongshimbynta shaphang ka jingdonkam ban burom, ban ïada ïa ki hok bad ka burom jong ki tymmen. La kyntu ïa ki ba kin wad ïa ka jingïarap aiñ kaba biang lada ki hok ne ki jingïoh bynta jong ki lada ki shah ktah.
Nalor kaba ai jinghikai, la pynlong ruh ïa ka Health Camp kum shibynta jong ka prokram, ha kaba la ai ïa ki jingshakri kum ka jingïoh jingtip shaphang ka koit ka khïah, ka jingïoh jingïarap ha ka liang ka koit ka khiah bad ka health screening na ka bynta ki tymmen kiba wan shimbynta.
Lyngba kane ka prokram, ka DLSA West Khasi Hills ka la pynpaw ïa ka jingaiti lut ban pynkhlaiñ ïa ka lad ban ïoh ïa ka hok, ka jingsngewthuh ïa ka aiñ, ka koit ka khiah bad ka burom jong ki tymmen, khamtam lyngba ki prokram kiba poi sha ki paidbah ha ki shnong bad ki jaka bapher bapher.
