Nongstoiñ, Risaw 06: Hapoh ka jingïalam jong ka Ministry of Youth Affairs and Sports Sorkar India, ka MyBharat Kendra Nongstoiñ, ha jingïatreilang bad ka West Khasi Hills District Yogasana Sports Association, ka la pynlong ïa ki prokram bapher bapher hapoh ka Seva Pakhwada 2026, naduh ka 17 Nailur haduh ka 2 Risaw 2026, halor ka phang ‘Sewa Se Samriddhi-People, Planet, Progress’.
Ïa kine ki prokram la pynlong hapoh ka jingïalam jong u Sahep Kashish, Director, MyBharat Kendra Nongstoiñ, u Bah Banshanlang Syiemlieh President WKH DYSA bad u Bah Bhaboklang Marweiñ Secretary WKH DYSA.
Ki prokram ki kynthup ïa ka jingïalehkai Futsal kaba la pynlong ha Mawiong Lumsyntiew ha ka 20 Nailur, ha kaba palat 60 ngut ki samla ki la wan shimbynta, ka Blood Donation Camp ha ka 24 Nailur bad ka Community Welfare Programme ha ka 26 Nailur. Ka jingthmu ka long ban pynkhlaiñ ïa ka jingïatreilang bad ka jingïashimbynta jong ki samla ha ki kam shakri paidbah.
La pynlong ruh ïa ka Cleaning Drive ha ka wah Mawiong Lumsyntiew, ha kaba ki nongshimbynta ki la lum ïa ki plastic bad kiwei ki jait jaboh na rud ka wah, ban pynsngewthuh ïa ka jingdonkam ban sumar ïa ka marïang bad ban pynneh ïa ka sawdong sawkun kaba khuid, ryngkat bad ka khubor ka long ‘Ki Shnong kiba Khuid, ka Imlang Sahlang kaba Koit ba Khiah, ka Meghalaya ba Phyrnai’.
Ka Seva Pakhwada ka la poi sha kaba kut ha ka 2 Risaw 2026, kaba dei ruh ka Gandhi Jayanti, da ka Thungdieng ha Mawiong Lumsyntiew, ha kaba ki samla ki la thung ïa ki tynrai dieng bad kular ban pynneh pynsah ïa ka mariang bad ban tei ïa ka lawei kaba kham jyrngam.
Lyngba kine ki prokram, ka MyBharat Kendra Nongstoiñ bad ka WKHDYSA ki la pynshlur ïa ki samla ban shimbynta ha ki kam sport, ki kam shakri paidbah, ka jingïada ïa ka mariang bad kiwei kiwei ki prokram kiba kyntiew ïa ka mynsiem jong ka seva.
