Ki jingpynshai na ka tnat District Election Administration ha kaba ïadei bad ka SIR 2026
Khliehriat Risaw 06: Ka District Election Administration East Jaiñtia Hills District ka kyrpad ïa baroh ki nongthep vote ba kin wan pynpoi noh ïa baroh ki kot donkam Special Intensive Revision (SIR) of Electoral Rolls, 2026, namar ha East Jaiñtia Hills District ki kam ba ïadei bad ka Notice and Hearing stage ki la ïaid shakhmat da ka jingtreikam ka tnat District Election Administration ban pyndep ïa ki jingpynshisha ha kaba ïadei bad ki nongthep vote.
La ong bad pynshai ba kat haduh ka 1 tarik u bnai Risaw 2026 ka tnat election ka la lah ban pynbiang haduh 28,673 tylli ki notice ha kaba 28643 tylli ki notice ki la poi sha ki nongthep vote bad ki sah sa 30 tylli ki bym pat poi, ïa ka hearing la lah ban pyndep bad ïa ki kot ki sla la dep upload ha ki 23891 tylli ki case.
Ha kajuh ka por, 4,781 hajar tylli ki cases ki dang sahteng na ka daw ka jingbymbiang ki kot donkam lane lehse na kiwei pat ki daw, kane ka wanrah ïa ka jinghiar sha ka 1.111 tylli ki case ba dang sahteng kaba naduh ka por ba la pyntip kata naduh ka 22 tarik u bnai nailur 2026.
Na ka liang ka District Election Administration ka kyntu ïa kito kiba la ioh pdiang ïa ki notice ba kin sngewbha ban shimkhia lada jia ba ka tnat ka donkam ïa ki kot ba donkam ba kin sngewbha ban pynbiang bad lada don ki kam ba dang sahteng sngewbha wat ap ne pynslem, ki bor district ki kyntu khamtam ïa ki 4781 ngut ki nongthep vote kiba la ioh ïa ki notice kiba dang sahteng ki kam ban pyndep na ka daw ka jingbym biang ki kot ba donkam ne na kiwei pat ki daw ba kin sngewbha ban wan shakhmat kham kloi katba lah ban pynbiang ïa ki kot donkam.
Shuh shuh ka District Election Administration ka kyntu ruh ïa baroh ki BLO, ki Supervisor, ki bor pyniaid shnong, ki Dorbar Shnong, ki nongialam shnong, ki Political Party bad baroh ki paidbah ba kin ai ka jingiatreilang da kaba kin sngewbha ban pynshlur ïa ki ningthep vote kiba ioh notice ba kin sngewbha ban shimkhia ïa ki notice ba ki la iohpdiang ba kin pynpoi noh ïa ki kot donkam, namar ka thong jong ka tnat Election ka long ban pyntikna ba kawei pa kawei ka case yn peit bniah ne examin bad bishar bniah katkum ka rukom treikam kaba katkum ki aiñ ne kyndon treikam.