Ka BJP kan sar naphang ha ka elekshon jong u 2028 ha Meghalaya: Bah Pariat
Lada pyllait ïa ka jingshah khang tih dewïong
Shillong, Risaw 04: U Chief Executive Member (CEM) barim jong ka Jaintia Hills Autonomous District Council (JHADC) uba long mynta kum u Executive Member (EM) hapoh ka Executive Committee ba ïalam u Bah Thombor Shiwat, u Bah Moonlight Pariat u la ong ba lada ka jingdawa ki phra ngut ki MLA kiba rung sha ka BJP kin urlong ka BJP kan sa sar ha ri lum Jaintia bad hapoh ka jylla Meghalaya.
Ïa kane u Bah Moonlight u la pynpaw ha ka 3 tarik u Risaw ha ka por ba u rung sha ka party BJP hapoh ka ophis trei kam jong ka BJP.
“Lada ka jingdawa jong ki phra ngut ki MLA kiba la rung sha ka BJP ban pyllait noh ïa jingkhang tih dewiong hapoh ka jylla, ka BJP kan sa sar naphang hapoh ka jylla Meghalaya” ong u Bah Pariat.
U Bah Pariat u la ong, Nga la leit sha kylleng ki jaka bad nga la sakhi da la ki jong ki khmat kumno ki paidbah ki im ïa ka jingim ba kordit ha kaba ki hap ban shu shong shu sah ha ki dara bad kumba 75 na ka 100 kidei ki briew kiba duk.
“Ngi donkam ban ïatrei lang ryngkat ryngkat bad ban pynsngew ïa kane ka mat sha ki nongïalam ba rangbah ha Delhi ban weng noh ïa ka jingkhang ban tih dewiong, ka BJP kan sar hapoh ka jylla Meghalaya” ong u Bah Pariat.
Na ka liang u Bah AL Hek u la ong, “ka jingwan ban pynïasoh ki phra ngut ki MLA ka UDP sha ka party BJP kane ka pyni bay n ym don ba lah ban khang ïa ka BJP ha u snem 2028 bad yn ioh ïa ka sorkar ba la lam khmat hi da ka BJP hapoh ka jylla Meghalaya”.
Ban pynurlong ïa kane ka shong eh baroh ha ki nongtrei jong ka party ban shim ïa ka jingkit khlieh bad ym dei ban shu ieh tang ha u State President ne ki nongialam ka party hynrei kan dei ka kamram jong u wei pa u wei ban pynurlong ïa kane, u la ong.
U Bah Sanbor Shullai haba kren u la ong, katba sha u leit kum u Myntri sorkar sha nongkyndong khamtam bad haba ïa kren bad ki ki ong ba ki lah ngiah lut ïa kiwei ki party katne ka jingleh bha u Narendra Modi, la iathuh i wei i tymmen ba don phra ngut ki khun ksiew ba dei ha ka por u Modi i ioh ban pdiang ïa ka scheme bapher bapher.
Haba pynsngew halor ka khubor ba ka BJP ka leh kumta leh kumta, ine i tymmen i tim pynban da kaba ong balei ban pyrshah haba katne lah leh bha ïa ki surok bad ki scheme bapher bapher, ong u Bah Sanbor.