Shillong, Risaw 06 : Ka Nangkiew Irat ka la pynkut ïa ka jingïalehkai jong ka ha ka Shillong Premier League (SPL) 2026 da kaba ïakhaid mar 2-2 kol bad ka Meghalaya Police ha ka jingïakhun kaba long ha madan SSA Stadium, Shillong, mynta ka sngi.
Ka jingïalehkai ka la long kaba shongshit naduh kaba sdang, ha kaba la ïoh ban sakhi haduh lai kol ha ki 21 minit kiba nyngkong. Ka Meghalaya Police ka la tam shakhmat lyngba u Everestarly Rynjah ha ka minit kaba 12, hynrei u Yhoto Lohe u la pynïakhaid ïa ka Nangkiew Irat tang hadien shi minit.
U Rapborlang Marwein u la lah ban pynlong ïa ka Meghalaya Police ban ïoh lamkhmat biang ha ka jingïoh thep kol ha ka minit kaba 21 da kaba ïoh ban khyrwit jam bha na jngai ïa ka bol bad leit beit sha ka jar jong ka liang pyrshah. Kumta tad haduh ban da kut ka kylla step ka kynhun jong ki Pulit ka la ïoh ban lamkhmat da 2-1 kol.
Ka Nangkiew Irat ka la wanphai biang ha ka kylla miet ha ka rukom ïalehkai kaba khlam khlain bad kane ka la pynbor ïa ka Meghalaya Police ban ïalehkai bun shadien ban khanglad ïa ka jingshah thep kol. Watla ka MLP ka la ïeng skhem ban khanglad hynrei ki rangïalehkai ka Nangkiew Irat ka la ïai bteng ban thaw ïa ki kabu ban ïoh thep kol.
Dei ha ka minit kaba 85, u Neblejohn Lyngdoh u la ïoh ban thep ïa ka kol kaba kongsan tam ban pynïakhaid ïa ka jingïalehkai da 2-2 kol. Kane ka la long ruh ka kol kaba khatduh jong ka jingïalehkai.
Shuwa kane, u Nikelson Bina u la jan pynïakhaid na ka bynta ka Nangkiew Irat, hynrei u rangap kol ka Meghalaya Police, u Eveningstar Bareh, u la kyrda tyngeh ïa ka bol. Hadien kane u Edyvenson Dhar ruh u la ïoh ban thep ïa ka bol shapoh ka jar, hynrei la pynbna pat ba ka dei ka offside.
Ka jingïakhaid ka pynlong ruh ïa ka Nangkiew Irat ban ïoh khur 9 point na ki baroh ki jingïakhun jong ka samoi, bad ka dang neh ha ka kyrdan kaba phra, ryngkat bad ka Sawmer. Kane ka jingkhur point ka lah ban ïarap ïa ka kynhun ban lait na ka jinghiar kyrdan, hynrei kin hap ban ap haduh ban kut ki jingïalehkai kiba dang sah ban tip ïa ka jinglong jingman ba khatduh.
Ka Nangkiew Irat, wat la ka la pynkut ïa ka samoi, kan ym lah ban rung sha ka SSA Super Cup, kaba long tang na bynta ki hynriew tylli ki kynhun kiba wan ha ki kyrdan kiba hakhlieh duh jong ka SPL.
Ka Meghalaya Police, pat, ka la kiew sha ka kyrdan kaba san da ki 11 point bad ka dang don sa kawei ka jingïalehkai ban pyndep ha kane ka samoi.
Ha kajuh ka por, ka Mawlai, kaba don ha ka kyrdan kaba hakhlieh duh, kan ïakynduh ïa ka Rangdajied United, kaba don ha ka kyrdan kaba hynriew, mynta ka sngi Balang ha ka por 3:00 baje janmiet .
Hadien ba la pyndep ïa ki 90 minit jong ka jingïalehkai, yn sa tip lada ka Mawlai kan pynkut ïa ka jingïakhun da kaba rah ïa ka nam lahduh, lane ka jingïakhun na bynta ka nam laduh jong ka SPL kan dang bteng shuh shuh ha ki sngi ban wan.
Lada ka Mawlai ka khur ïa ka jingjop, kan rah ïa ka nam lahduh jong ka SPL ha ka sien kaba lai. Ka kynhun ka la ju rah ïa kane ka nam lahduh ha ki snem 2022 bad 2023, bad mynta ka don ha ka lynti ban iakhun biang ia kane ka nam.
