Ban ai mynsiem ïa u Dr. Batskhem, da ka jingïalang kaba heh yn pynlong ka VPP la 10 tarik

Shillong, Risaw 04: U President ka Voice of the People’s Party (VPP), u Bah Ardent Miller Basaiawmoit u la pyntip ba ka seng kan pynlong ïa ka jingïalang kaba heh jong baroh ki nongkyrshan jong ka party ban ai ka jingkit bok bad ai mynsiem ïa u kyrtong MP ka seng u Dr. Batskhem Marboh.
Haba kren sha ki lad pathai khubor ha ka sngi Saitjaiñ u Bah Ardent u la ïathuh ba kane ka jingïalang kan long ha Madan Polo ha ka por 12 baje shiteng Sngi ha ka 10 tarik mynta u bnai bad kane kadei ka jingïalang jong ka Shillong Parliamentary Seat ki nongïalam, ki nongkitkam bad kumta u la wer la khot sngewbha ïa baroh ban ïa poi khnang khnang sha kane ka jingïalang.
U la ïathuh ruh ba u kyrtong ka seng katba nangmih ki sngi u la ïoh kham bun ki jingieid na ki paidbah jong ka Shillong Parliamentary Constituency bad kumta u la pynpaw ka jingkyrmen ba u Dr. Batskhem un lah ban nangïoh shuh shuh ki jingieid ha kine ki sngi ban wan bad ban poi ruh sha ka kyrdan ka jingjop bad u la kyrpad ïa ki paidbah ban nang ai shuh shuh ki jingkyrshan ïa ka VPP khnang ba kan wanrah ki jingkylla ïa ka saiñ pyrthei ha kane ka jylla Meghalaya.