Nongpoh, Risaw 4: Uwei u rangbah u la mynsaw jur hadien ba ka scooty kaba ki shong ar ka la kylla kynsan ha surok bah National Highway ha Dulongnar, Ri-Bhoi District, mynta ka janmiet sngi u Blei.
Katkum ka jingtip ba la ïoh lum, la ong ba kane ka jingjia ka la jia ha ka por kumba 3:30 baje eiei janmiet, ha kaba ka scooty kaba don ïa u registration number AS 25 A 4416 ka dang hiar sha ka thaiñ Nongpoh hynrei haba poi ha katei ka bynta kala don ka jaka kaba kham sniew ha kaba u nongñiah um shym la lah shuh ban tehlakam ïa ka scooty, kaba la pynlong ïa ka ban kylla hapdeng ka surok. Ha katei ka jingjia, uwei napdeng ki arngut kiba shong ha ka scooty u la mynsaw jur haduh ba u la kheiñ ka kjat.
Mar ïa ïoh jingtip halor ka jingjia, ki pulit jong ka Nongpoh Traffic Police ki la leit mar mar sha katei ka jaka ban lum jingtip bad pynlong ïa ka jingtohkit halor ka daw jong ka jingjia.
Ïa kitei ki arngut kiba mynsaw la pynkit noh sha Nongpoh Civil Hospital ban ïoh ïa ka jingsumar kaba kyrkieh.
Lyngba kum kine ki jingjia ki bor ba dei peit khamtam ka NHAI kam dei ban shu peit tang ki khmat ïa bun ki bynta ba sniew u surok 4 lane kaba long pynban kum ka jingpynap shrip ïaki paidbah khamtam ki ar shaka, bad kum ki bor ba dei peit ki dei ban shimkhia mardor ban pynbha ïa shilynter u surok 4-lane naka bynta ka jingshngaiñ ki paidbah haka leit ka wan ym ban ap haduh ban da jia ki jingjia ba sngewsih.
