Shillong, Risaw 03: Ka Nongkseh ka la pynneh pynsah ïa ka jingkyrmen ïaknieh nam lahduh jong ka ha ka Shillong Premier League 2026 hadien ba ka la pynliem noh ïa ka Laitkor da 3-1 kol ha ka jingïalehkai kaba itynnad bha ha SSA Stadium ha ka sngi Saitjaiñ.
U Hardy Cliff Nongbri (55’), u Dawanchwa Challam (81’) bad u Shano Tariang (90’+5) ki la pynkhihjar na ka bynta ka Nongkseh katba ka shi kol jong ka Laitkor la thep da u Shelbilkstar Kharshilot (87’).
Kumta da kane ka namjop ka Nongkseh ka la kiew sha ka kyrdan ba lai ha ka miej da 16 poiñ. Kane ka pynlong ruh ïa ka ban ïaryngkat bad ka Langsning kaba ïada ïa ka nam lahduh hynrei ka Nongkseh ka don ïa ka jingïapher kol kaba kham bun (da +12 la +10); kine ki arliang mamla kin ïakynduh tang ha ka jingïalehkai kaba kut jong ka samoi ha ka 10 tarik u Risaw.
Ha kawei pat ka liang ka Laitkor ka jam sha kane ka jingïakhun da kawei ka jingthmu, kata ka long ban kyntiew ïalade na ka thup kyrdan shah sloit (relegation zone) – hynrei ka jingshah rem ka la pynlong ïa ka ban dang sahkut sah ha ka kyrdan kaba khyndai da tang 6 poiñ, bad ka sah mynta sa tang kawei ka jingïalehkai ban pyndep.
Watla kane ka dei ka nam rem kaba hynriew, hynrei ka Laitkor ka la ïalehkai bha bad kam shym la long satia kaba suk ïa ka Nongkseh ban khur ïa ka jingjop.
Hadien ka jingïalehkai kaba khlem kol ha ka kylla step, ka kol lamkhmat ka la urlong tang 10 minit ynda la sdang ka kylla miet, hadien ba u Mebankhraw Wahlang u la ïoh ban pyndep tiak ïa ka bol pashat na ka corner kick. Katei ka jingpyrshang ka la shah khanglad hynrei u Hardy u la don hajan ka bol ban pyndep ïa ka kamram. Une u kapten ka Nongkseh u la kynjoh mynta 6 kol, ban bat kyrdan ba nyngkong ha ka thup ki nongthep kol ba bun tam (Top scorer) jong ka SPL 2026.
Ka Nongkseh ka la pynjlan ïa ka kol lamkhmat jong ka ha ka por ba sah sa tang 10 minit eiei ban ïalehkai hadien ba arngut ki nongïalehkai jong ka Laitkor ki la ïalymbup marmet katba ki dang mareh sha ka bol. Kane ka la ailad ïa u Hardy ban rah ïa ka bol shakhmat bad pashat sha u Skilful Tariang, uba dang shu mih na ben shong. Ka jingpyrshang kaba jam jong u Skilful ka la shah khanglad; hynrei ka bol ka la wanphai sha u Dawanchwa, uba la shu thep suk ei jlang sha kol.
Wat hadien kane, ka jingjop kam pat long kaba thikna ïa ka Nongkseh, ha kaba ka Laitkor ka la pynphai shi kol lyngba u Shelbilkstar.
Katei ka kol ka la pynkiew ïa ka jingsyier jong ka Nongkseh namar ka jingïakhaid kan jin da la pynkut noh ïa ka jingkyrmen jong ki ban ïoh ïa ka nam lahduh. Hynrei ki la lah ban ïada bha ha ki minit ba sah ban khanglad ïa kawei pat ka kol bad, ha kaba kut, u Shano u la pynskhem ïa ka jingjop da kaba thep ïa ka kol kaba lai.
Ka jingïalehkai kaban wan kan long lashai ka sngi Ba-ar hapdeng ka Nangkiew Irat, kaba wan ha ka kyrdan ba 8 (8 point) pyrshah ïa ka Meghalaya Police, kaba wan ha ka kyrdan ba 6 (10 point) ha ka por 3 baje nohphai sngi. Ka Nangkiew Irat ka dang don ha ka jingma ban hiar kyrdan hynrei ka dang ïakhun ruh ban ïoh jaka ha ka thup kyrdan Top 6, kaban pynlong ïa ka ban ïoh jaka ha ka SSA Super Cup ka ban sa long shen.
