‘Ka kamram jongnga ban leh bha ïa ka Ri-Lum Jaiñtia ha ka jinglong MP’ : Dr. W. Kharlukhi

Jowai, Nailur 25: U MP barim ka Rajya Sabha u Dr. Wanweiroy Kharlukhi mynta ka sngi Thohdieng 25 tarik u Nailur, 2026 ula wan ban plie ïa ka ophis thymmai jong ka Loomkyrwiang Dorbar Shnong, Jowai.
La wan ban donlang ha kane ka sngi da u ma A. Andrew Shullai (MDC) kum u symbud kongsan uba dei ruh u nongïalam ka liang pyrshah ha JHADC, ki Waheh Shnong bad kiwei de kiba la shah khot sngewbha, ïa ka jingïalang la pynïaid da u Waheh Shnong ma Lammat-oo Laloo uba la pynsngew shaphang ka jingïaid lynti jong ka shnong.
Shuh shuh u ma Laloo ula pyrto ïa ki nongïalam shnong naduh ba seng ïa ka shnong bad kiba don shisha ka mynsiem trei shitom ban kyntiew ïa ka shnong ha baroh ki liang, kum ki nongïalam kila wad ki lad ki lynti ban shna ïa ka ïing Club naduh ba sdang ïa ka da ki lyngtang dieng bad haduh kumba ka long mynta. Ula ai khublei ïa u MP barim ula la ïarap kylluid mynsiem ïa katei ka ophis thymmai, nalor ki jingïarah jong kiwei de ki MP ba rim, ki MLA, ki MDC bad ki tnad sorkar.
U Dr. Wanweiroy Kharlukhi haba ai jingkren kum u kongsan ula pynsngew kum u khun ka ‘Ri Jaiñtia’ ula pyrshang ban pyndep hok ïa ka kamram haka jinglong MP, ula kular ruh ban dang ïaibteng ïa ka jingshakri katba lah ka bor ha ki por ban wan.
“Nga la heh la san ha Jowai, nga la long u President ka JSU bad nga la ïoh shibun ki jingkyrshan ha ki jingïakhih, nga la don haka party UDP bad ha u snem 1998 ka Party ha Ri-Lum Jaiñtia kala jop ha baroh 7 tylli ki Constituency, nangta saka haka party NPP ïa nga la tyrwa ban long MP ha u 2008 hynrei nga khlem shim namar ka party ka dang sdang”.
Hynrei ynda la poi u snem 2018 ka party kala ïoh jingjop bun eh hapoh Ri-Lum Jaiñtia bad naduh u snem 2020 nga shim ïa ka kam MP bad shibun na ki skim nga la thep shapoh ka Ri Jaiñtia, halor kane ka nongrim bad ka jingkyrshan ba nga ïoh napoh ka shnong ba kha ïa nga, kumta ka dei ka kamram jong nga ban lehbha kyrpang ïa ka Ri Lum Jaiñtia, ong u Dr. Wanweiroy Kharlukhi.
Ula pynkut ïa ki jingkren da kaba ong ‘ki paidbah ki long ki kynrad bad ka kamram jong ngi ban leh bha na ka bynta jong ki’. Hadien ka jingïalang u kongsan ula plie ïa u maw nongrim bad plie kumjuh ïa u tala jong ka ophi ba thymmai ka shnong.