Da ki jingstad technology ïoh kurup ki Pulit Jowai haduh 47 tylli ki Mobile Phone kiba jah bad aiti noh sha ki trai

Khliehriat nailur 24 :- Ha ka jingtreikam kaba kongsan lyngba ki kor ki bor jong ka jingstad technology, ki pulit ka Jowai, West Jaiñtia Hills District ba la lam khmat da ki ar ngut ki Superintendent of Police u Jagpal Singh Dhanoa, IPS bad u Jeson Myrom MCS , ryngkat ka jingiatreilang bad ki pulit jong ka West Jaiñtia Hills District ki la lah ban budien ïa ki mobile phone ba la jah ba la ujor da ki trai phone bad ki lapdien bad ioh kurup noh haduh 47 tylli ki mobile phone kiba jah bad shah tuh ïa kiba la pynphai noh sha ki trai kiba dei hok hadien ba la dep ban pynshisha.
Lyngba u kyrwoh na ka tnat pulit West Jaiñtia Hills District la pynpaw ba ki la ioh pdiang ïa kiba bun ki jingujor na ki shongshong shnong ha kaba iadei bad ka jingjah bad ka jingshah tuh ki mobile phone mynta lah kumba katto katne por.
Kumta da kaba pyndonkam ia ki kor ki bor jingstad technology bapher bapher, ka kynhun ki pulit ki la lapdien bad ioh kurup biang ia kine ki mobile phone na ki jaka bapher bapher, la kurup wat na shabar ka district, shabar ka jylla ruh.
Ka jingtohkit ka dang ïaid ban lap ïa ka jingiaid lynti jong kine ki mobile phone ba jah bad ban tip ïa ki briew kiba kine ki tiar ki la iaid lyngba ki kti jong ki bad ruh ban tip kumno kine ki mobile phone ki la poi sha ki jaka bapher bapher.
Ka jingshim ïa ki sienjam pyrshah ïa kito kiba donkti kan ïaid shakhmat katkum ka aiñ.
Ki pulit ki kyntu bad maham ruh ïa ki paidbah ba kin long kiba husiar ban thied ïa ki mobile phone ba la pyndonkam na ki briew ki bym lah ban ithuh ne na ki nongdie bym ioh jingbit khlem da pynshisha namar ki lah ban dei ki mobile phone kiba ki shu tuh.